Um­ræðan verið erfið fyrir eigin­konuna

„En fyrst svona er komið þá er hægt að fara tvær leiðir – tilkynna veikindaleyfi og að þú munir snúa til baka á Alþingi þegar þú hefur heilsu til eða fara í stríð,“ segir meðal annars í skilaboðunum sem Guðbjörg sendi Guðmundi.

Í kjölfarið sagði Guðmundur af sér ráðherradómi og seinna gekk hann úr Flokki fólksins.

Ótal sögusagnir og kenningar hafa farið á kreik eftir að Guðmundur birti þessi samskipti. Bjarki spurði Ragnar hreint út hver hans aðkoma að þessu væri. Hvort hann hafi komið nálægt afsögn Guðmundar Inga áður en hann tók við ráðherradómi?

„Ég hafði enga aðkomu að því máli, nei.“

Sá samskiptin fyrst í fjölmiðlum

Konan þín, Guðbjörg Ingunn, var aðstoðarmaður Guðmundar Inga. Hún sendi honum umdeilt bréf þar sem honum voru gefnir afarkostir. Komst þú eitthvað nálægt því?

„Nei, ég kom ekkert nálægt því. Ég sá þau samskipti í fyrsta skipti þegar þau birtust í fjölmiðlum.“

Hvernig er afsögn Guðmundar Inga frá þínum bæjardyrum séð?

„Aðdragandinn er auðvitað sá að hann veikist mjög alvarlega. Hann fer í opna hjartaaðgerð. Ráðuneyti hans er auðvitað stórt og mikilvægt, viðkvæmir málaflokkar sem þar eru. Ég held að flestir muni nú þá umræðu sem verið hefur í kringum mörg mál, sérstaklega menntamálin og meðferðarúrræði barna og svo framvegis. Það stóð mikill styr. Þessi alvarlegu veikindi hjálpuðu ekki til. Það er í sjálfu sér aðdragandinn. Það sem snýr að þeirri ákvörðun formanns að gera breytingar, ég hafði ekki aðkomu að henni.“

Hafði engan hug á ráðherradómi

Svo ert þú beðinn um að taka við ráðherraembætti, konan þín er fyrrverandi aðstoðarmaður; fannst þér þau tengsl óheppileg?

„Nei, í sjálfu sér ekki. Ég leit ekki á það þannig. Þátttaka mín í pólitík snýst auðvitað um að við séum að stilla upp liðsheild. Ekki bara í ráðuneytunum heldur einnig í hinum mikilvægu störfum sem eru á þinginu. Ég var afskaplega sáttur í þeim störfum sem ég var í; bæði sem formaður þingflokks og formaður fjárlaganefndar. 

Ég hafði engan hug á að gera breytingar á því. Það gekk bara vel og samstarfið á þinginu með stjórnarmeirihlutanum var afskaplega gott. Ég hafði ekki sóst eftir ráðherrastól.“

Segir umræðuna óvægna

Hvernig finnst þér umræða síðustu daga hafa verið?

„Hún hefur auðvitað verið erfið, þá sérstaklega fyrir konuna mína og auðvitað fjölskylduna. En þetta er auðvitað sá veruleiki sem fólk sem fer inn á þennan vettvang stjórnmálanna þarf að búa við. Það er þá ákvörðun hvers og eins hvort hann fer í þá vegferð. Orðræðan er auðvitað mjög hvöss og mjög hörð og getur auðvitað verið ósanngjörn og óvægin líka. Þetta tekur auðvitað á.“

Guðmundur birti skilaboð sem aðstoðarmaður hans sendi honum í þessu máli. Hvernig finnst þér hann hafa hagað sér í þessu máli?

„Ég ætla svo sem ekki að tjá mig um það. Ég átti ekki í neinum samskiptum við Guðmund á þessum tíma, hvorki í aðdraganda aðgerðarinnar né þegar hann var að jafna sig eftir hana. Ég get ekki svarað fyrir samskipti sem hann átti við aðra eða vitnað til þeirra. Ég hef ekki vitneskju um hans samskipti við aðra.“

Ragnar Þór segist hafa vitað það eitt að Guðmundur Ingi hafi sagt af sér embætti.

„Í framhaldi af því er rætt við mig um að taka við félags- og húsnæðismálaráðuneytinu eftir ákveðna tilfærslu sem formaður var búinn að gefa ákveðinn tón um að yrðu mögulega gerðar. Eins og gerist í pólitík eru það formenn stjórnmálaflokka sem raða í embætti. Þingflokkar staðfesta það svo eftir að búið er að skipa í stöður og ráð. Þannig hefur það alltaf verið og verður sjálfsagt áfram. Þetta eru ákvarðanir sem eru teknar. Ég þurfti svo bara að vega það og meta hvað ég vildi gera. Það var ekki mikið í stöðunni annað en að taka við þessu.“

Segir eiginkonu sína hafa haldið dyggan trúnað við sinn ráðherra

Ragnar segist hafa boðið Guðmund hjartanlega velkominn þegar hann kom aftur á þing eftir aðgerðina. En finnst honum að Guðmundur hafi vegið að sér og konu hans í kjölfarið?

„Ég ætla ekki að hafa nein orð um það. Hann verður að eiga það við sig. Þarna er verið að birta trúnaðarsamskipti þeirra á milli, samskipti sem ég hafði enga vitneskju um. Hvorki þessi né önnur. Ég veit bara að mín eiginkona hélt dyggan trúnað við sinn ráðherra, sem hún var að aðstoða, og ég held að það skíni í gegnum þau skilaboð sem hafa verið birt. Þar er væntumþykja.“