Styttist í lokun flug­vallar sem tengist flug­sögu Ís­lendinga

Í fréttum Stöðvar 2 lentum við á Narsarsuaq-flugvelli, sem Bandaríkjaher gerði á árum síðari heimsstyrjaldar meðal annars til að hafa millilendingarstað fyrir herflugvélar á leið milli Ameríku og Íslands. En núna er fyrirhugað að honum verði lokað í apríl 2026 þegar nýr flugvöllur fyrir Suður-Grænland verður opnaður við bæinn Qaqortoq.

„Þá verður þessum flugvelli lokað sem flugvelli og honum breytt í þyrluvöll,“ segir Ingibjörg Gísladóttir, starfsmaður á skrifstofu Narsarsuaq-flugvallar.

Ingibjörg annast meðal annars þjónustu við flugmenn á leið um völlinn. Þegar við vorum á staðnum var hún að aðstoða Hallgrím Leifsson, flugstjóra hjá Mýflugi, við undirbúning flugs til Íslands.

Flugvöllurinn í Narsarsuaq hefur ætíð verið sérstaklega kær íslenskum flugmönnum enda er hann í hjarta hinnar fornu norrænu byggðar sem Eiríkur rauði stofnaði árið 985. Bær Eiríks, Brattahlíð, er raunar talinn hafa staðið beint á móti flugvellinum hinum megin við fjörðinn.

Narsarsuaq er gjarnan síðasti viðkomustaður ferjuflugmanna og smærri flugvéla á leið frá Ameríku til Íslands. Flugvöllurinn tengist einnig flugsögu Íslendinga en margskyns verkefni á Grænlandi, oft með Narsarsuaq sem miðstöð, höfðu mikla þýðingu fyrir íslensku flugfélögin í árdaga flugsins.

„Það verður mikill söknuður að þessum flugvelli, það er alveg rétt,“ segir Ingibjörg.

Og ekki síst fyrir Íslendinga vegna tengsla flugvallarins við bæði landnámssögu Eiríks rauða og sögu íslensku flugfélaganna.

„Og ég held að mögulega fyrsta flug frá Íslandi til Grænlands hafi verið hingað, þá sennilegast í samvinnu við SAS á sínum tíma. Þannig að þetta er löng saga sem er hingað,“ segir Ingibjörg en þetta fyrsta flug íslensks flugfélags vegna verkefnis á Grænlandi gæti hafa verið árið 1949, eða fyrir 75 árum.

Ingibjörg hefur starfað samfellt á Grænlandi frá árinu 2010 en tengsl hennar við land og þjóð ná þó mun lengra aftur í tímann.

Um 150 manns búa í þorpinu við Narsarsuaq-flugvöll. En hvað verður um samfélagið þar þegar rekstri flugvallarins verður hætt?

„Þorpið er hér eingöngu af því að það er flugvöllur. Þannig að sennilegast verður ekki mikið eftir, allavega ekki með heilsársbúsetu.

En það getur verið að það verði einhverjir þrír fjórir hérna eftir með heilsársbúsetu. Annars verður bara eitthvað í gangi hérna á sumrin fyrir ferðamenn.“

-En hvað um þig? Hvað gerir þú?

„Þegar stórt er spurt þá verður oft fátt um svör. Ég bara veit það ekki, eins og er,“ svarar Ingibjörg Gísladóttir.

Hér má sjá frétt Stöðvar 2:

Svæðið í kringum Narsarsuaq-flugvöll er skógi vaxið og eitt hið gróskumesta á Grænlandi, sem sjá má í þessari frétt frá árinu 2016:

Margir Íslendingar hafa í gegnum tíðina tengst svæðinu, eins og þessi ungmenni, sem fengu þar sumarvinnu:

Efasemdir eru um að Brattahlíð Eiríks rauða sé rétt staðsett, sem sjá má hér: