Halda hækkunum innan við 2,5 prósent og hætta við lækkun systkinaafsláttar

Frá því er greint í tilkynningu að bæjarráð Hafnafjarðar hafi ákveðið á fundi í gær að setja það sem grundvallarviðmið við fjárhagsáætlunargerð bæjarins, sem nú stendur yfir, að almennar gjaldskrár yrðu ekki hækkaðar umfram 2,5 prósent.

Fram kemur að Hafnarfjarðarbær svari þar með ákalli Sambands íslenskra sveitarfélaga og aðila vinnumarkaðar um sameiginlegt átak gegn verðbólgu. Landsþing Sambands íslenskra sveitarfélaga samþykkti í síðustu viku ályktun um að halda hækkunum almennra gjaldskráa innan 2,5 prósenta á næsta ári.

Sömuleiðis er greint frá því að í ljósi þessarar ákvörðunar hafi bæjarráð ákveðið að hverfa frá breytingu á systkinaafslætti á leikskólum Hafnarfjarðarbæjar, sem samþykkt var í bæjarráði 17. september og átti að koma til framkvæmda 1. nóvember.

Sú breyting átti að felast í því að afláttur fyrir annað systkinið yrði lækkaður úr 75 prósentum í 50 prósent, og fyrir þriðja systkini úr 100 prósentum í 75 prósent.

Sveitarfélagið segir nú í tilkynningu að sú breyting hefði haft í för með sér hækkun leikskólagjalda umfram 2,5 prósent í ákveðnum tilfellum.

Á fyrri helmingi árs var rekstrarniðurstaða Hafnarfjarðarbæjar neikvæð um 1,9 milljarða króna samkvæmt árshelmingsuppgjöri á sama tíma og fjárhagsáætlun gerði ráð fyrir 887 milljóna króna hagnaði.