Full­trúi Ís­lands yfir­gaf ekki salinn með hinum

Þetta segir Ingileif Friðriksdóttir, aðstoðarmaður utanríkisráðherra. Hún hafi þess í stað verið á viðburði til stuðnings Palestínu-flóttamannahjálpar Sameinuðu þjóðanna (UNRWA) sem fram fór á sama tíma. 

Fulltrúi fastanefndar Íslands í mannréttindamálum var í sæti Íslands í sal allsherjarþingsins og sat þar áfram, ásamt fulltrúum annarra norrænna ríkja, að sögn Ingileifar. 

Hún nefnir umræddan fulltrúa ekki á nafn í svari sínu til fréttastofu. Utanríkisráðuneytið vill ekki nafngreina fulltrúann sem sat áfram*.

„Ísland, eins og önnur norræn ríki, hefur sæti landsins ávallt mannað í umræðum í ráðherraviku allsherjarþings Sameinuðu þjóðanna,“ sagði í skriflegu svari utanríkisráðuneytisins við fyrirspurn Vísis.

Ráðherravika allsherjarþings Sameinuðu þjóðanna stendur nú yfir. Aðstoðarmaður utanríkisráðherra segir að Þorgerður hafi jafnframt tekið þátt í ráðherraviðburði um tveggja ríkja lausnina fyrr um daginn en markmiðið með henni er að koma á friði í samskiptum Ísraels og Palestínu.

Benjamín Netanjahú lét sér fátt um finnast þegar fulltrúar ríkja yfirgáfu salinn og kallaði þá siðferðislega hugleysingja.

Ásakanir um þjóðarmorð „stærsta lygi aldarinnar“

Netanjahú sagði ásakanir um þjóðarmorð Ísraelsmanna á Gasa vera „stærstu lygi aldarinnar“ í ögrandi ræðu frammi fyrir hálftómum sal allsherjarþingsins.

Þegar hann steig upp í ræðustól brugðust sumir við með fagnaðarlátum á meðan aðrir púuðu og gengu út, að sögn AP-fréttaveitunnar. Meirihluti sæta hafi verið auður þegar hann flutti ræðu sína.

„Ef það eru einhverjir aðrir siðferðislegir hugleysingjar sem hafa ekki enn yfirgefið salinn, vinsamlegast gerið það núna,“ sagði Netanjahú.

Hann hækkaði síðan róminn og sagði árásir Ísraels á Íran „hafa verið ein auðveldasta ákvörðun sem ég hef nokkurn tíma þurft að taka.“ 

Mahmoud Abbas, forseti Palestínu, neyddist til að ávarpa Sameinuðu þjóðirnar með myndskeiði eftir að Bandaríkin synjuðu honum aftur um vegabréfsáritun og komu þannig í veg fyrir að hann gæti sótt allsherjarþingið.

Fréttin hefur verið uppfærð. *Í upphaflegri útgáfu hennar voru tveir fulltrúar úr fastanefnd Íslands gagnvart mannréttindaráði Sameinuðu þjóðanna í Genf nafngreindir. Talsmaður utanríkisráðuneytisins segir að þeir hafi ekki verið á staðnum og að ráðuneytið nafngreini ekki fulltrúann sem sat undir ræðu Netanjahú.