Er­lendir sér­fræðingar meta fýsi­leika þess að sækja líkams­leifar Lúð­víks

Frá þessu greinir Morgunblaðið og hefur eftir Margréti Kristínu Pálsdóttur, lögreglustjóra á Suðurnesjum, að sérfræðingunum sé ætlað að gefa yfirvöldum hlutlaust álit á skýrslu verkfræðistofunnar COWI.

Það var niðurstaða skýrslunnar að vænlegast væri að láta björgunarmenn síga niður í sprunguna til leitar í stigvaxandi aðgerðum, þar sem fyrst yrði framkvæmd sjónleit og síðar mögulega ráðist í að færa efni með handafli og mögulega verkfærum.

Samkvæmt skýrslunni hefur ekki sést til Lúðvíks í sprungunni en þess er getið að hann var ekki í sýnileikafatnaði heldur lopapeysu og jarðlitum sem falla að umhverfinu. COWI mat það ekki skynsamlegt að ráðast í uppgröft eða sprengingar í sprungunni, þar sem það gæti valdið því að líkamsleifarnar færðust enn neðar.

Að sögn Margrétar verður mat erlendu sérfræðinganna fellt inn í heildstætt mat sem henni hefur verið falið að vinna. Samkvæmt Morgunblaðinu er stefnt að því að hefja viðgerðir við húsið þar sem slysið átti sér stað í haust.