Bakkakotsvelli lokað vegna rigninga: Grjótharðir golfarar láta í minnipokann

„Það heldur áfram að rigna og staðan er því miður ekki nægilega góð uppi í Bakkakoti þar sem völlurinn er orðinn vatnsósa og erfitt að komast um hann. Gerum við þetta til þess að hlífa vellinum og koma í veg fyrir skemmdir,” segir í tilkynningu sem vallarvörður hefur sent frá sér.

Sannast sagna hefur ekki viðrað vel fyrir golfara það sem af er júlímánuði. Bakkakotsvelli verður lokað í dag og hefur þeim kylfingum sem áttu bókaðan rástíma þar verið sendur póstur þar að lútandi. Ekki er vitað hvernig ástand annarra valla er en ekki er ósennilegt að gripið verði til sömu ráða á fleiri bæjum.

„Veðurspáin fram undan er hagstæð og sól í kortunum. Vonandi verður þetta bara í dag,“ segir í tilkynningunni en þó sagt að mögulega geti votviðrið staðið fram eftir degi og á morgun.

Uppfært 13:08

Nú hefur Golfklúbbur Kópavogs og Garðabæjar bæst í hópinn:

„Þar sem vellirnir okkar eru mjög blautir eftir vætutíðina undanfarið þá verða golfbílar ekki leyfðir næstu tvo daga a.m.k, þ.e. miðvikudag og fimmtudag.“

Þeir í GKG banna golfbíla næstu tvo daga. Búast má við því að fleiri golfklúbbar fylgi í kjölfarið enda allt á floti.