„Þetta er bara toppurinn á ís­jakanum“

Greint var frá því í Reykjavík síðdegis á Bylgjunni í gær að sjötugur maður hefði nýlega misst aleiguna til fjárkúgara. Hann hafi greitt hópi fólks ríflega hundrað og átta milljónir króna sem hafi höfðað til góðmennsku hans en einnig hótað honum ofbeldi og því að ljúga upp á hann öllu illu ef hann neitaði að borga. 

Maðurinn sagði fjölskyldu og vinum ekki frá málinu fyrr en systkini hans urðu vitni að því að honum var hótað ofbeldi en maðurinn lýsti því að hafa óttast að fara til lögreglunnar vegna skammar og hræðslu við að fólkið myndi þá tvíeflast. Það hafi svo tekið fjórar tilraunir til að fá lögreglu til að taka málið upp, það hafi ekki gerst fyrr en eftir að maðurinn hafði útvegað sér lögmann.

„Þetta er bara enn eitt dæmið sem við lesum um í fréttum varðandi eldri borgara og ofbeldi sem eldri borgarar lenda í. Það er dapurlegt að heyra þetta en enn og aftur staðfestir þetta að þessi mál eru mjög útbreidd en vandamálið er, líkt og kemur fram hjá þessum þolanda, að hann vildi ekki kalla til lögreglu, vegna þess að þetta væri svo mikil skömm í hans huga,“ segir Sigurður Ágúst Sigurðsson formaður Félags eldri borgara í Reykjavík.

Hann segir eldri borgara sárlega þurfa á úrræði að halda sem geti nýst þeim í slíkum aðstæðum. Lögregla sé að öllu leyti reiðubúin til að aðstoða en ljóst sé að eldri borgarar veigri sér við að fara til lögreglu og segir Sigurður hægt að setja á fót Umboðsmann eldri borgara sem geti veitt ráð og aðstoðað í slíkum málum.

„Að það sé einhver aðili sem er hægt að leita til með því að taka upp símann og hringja, því að þetta fólk er ekki mjög tölvuvænt. Þannig að það sé allavega aðgengi að slíkri aðstoð og að það sé miklu betra heldur en það er í dag.“

Hefurðu heyrt um viðlíka mál? Þarna er talað um 108 milljónir, aleiga mannsins sem er hreinlega hirt af honum?

„Já, já. Við erum búin að vera að heyra þetta og það hefur líka verið í fréttum. Á síðasta ári voru fréttir af tugmilljóna svindli sem lögregla upplýsti um, allt upp í marga tugi milljóna. Ég hef ekki heyrt um hundrað milljónir áður en svona er þetta bara í dag, veruleikinn. Eldri borgarar eru svo auðtrúa og trúa ekki neinu illu upp á fólk og vilja allt fyrir alla gera en átta sig ekki á því að þeir eru að eiga við glæpagengi.“

Hann óttast að mál líkt og þessi séu mun fleiri. Telur það raunar líklegt.

„Við höfum töluverðar áhyggjur af því að þetta er miklu dýpra á þessum málum heldur en við sjáum. Þetta er bara toppurinn á ísjakanum.“