Ömurlegt að sjá skilaboð á veggnum sem geti ekki talist annað en pólitísk

Freyja Þórisdóttir skrifar 11. maí 2026 21:27

Verkið Sólarslóð eftir listakonuna Theresu Himmer var afhjúpað við Hamraborg í Kópavogi þann 5. júlí árið 2019 en það var því orðið um sjö ára. Að sögn Elísabetar var einungis samið um að það fengi að vera á veggnum í þrjú ár. Facebook/Vefur Kópavogsbæjar

Þrjátíu og þriggja metra langt listaverk sem hefur prýtt vegg í Hamraborg í Kópavogi síðustu sjö árin hefur vikið fyrir auglýsingu. Breytingin hefur vakið athygli meðal íbúa en meðal þeirra sem hafa tjáð sig um málið er Margrét Tryggvadóttir, formaður Rithöfundasambands Íslands. Kópavogsbær hafnar því að breytingin hafi nokkuð með pólitík að gera.

Í færslu sem hún birti á Facebook-síðu sinni í dag segist henni hafa brugðið við breytinguna. Hún hafi áður setið í Lista- og menningarráði Kópavogs en situr nú í 14. sæti á lista Samfylkingarinnar í Kópavogi.

Margrét Tryggvadóttir formaður Rithöfundasambands Íslands er ekki hrifin af nýja verkinu.Vísir/Anton Brink

„Þar höfum við verið áfram um að fjölga útilistaverkum í bænum en ekki fækka þeim! Ef ég man rétt átti verkið aldrei að vera varanlegt en það hefur þó staðið í næstum sjö ár og var alls ekki illa farið – og það sem meira er hafði að mestu verið látið vera af öðrum veggjalistamönnum.

Það hefur mér þótt aðdáunarvert. Ég á leið þarna um næstum daglega og hef því upplifað verkið við allar aðstæður og aldrei man ég eftir veggjakroti á því,“ segir Margrét í færslunni.

Hún segist ósátt við það að „listaverk sem bærinn hefur varðveitt síðustu ár hafi vikið fyrir kosningaauglýsingu meirihlutans á kostnað bæjarbúa“ og þyki ömurlegt að sjá skilaboð sem að hennar mati geti ekki talist annað en pólitísk séu nú á veggnum.

Fjórum árum lengur en til stóð

Formaður Menningar- og mannlífsnefndar í Kópavogi, Elísabet B. Sveinsdóttir, segist sjálf ekki hafa frétt af þessu fyrr en í dag, þann 11. maí.

„Þetta kom ekki inn á borð til okkar í nefndinni en mér skilst að þetta sé bara tímabundið og ég ímynda mér að það sé svo eitthvað nýtt sem kemur þarna eftir kosningar,“ segir Elísabet í samtali við blaðamann Vísis.

Hún nefnir þó að upphaflega hafi verið samið um að verkið fengi að vera á sínum stað í þrjú ár. Það sé því löngu búið að uppfylla skilyrði samningsins enda séu komin um sjö ár síðan verkið var afhjúpað.

Á vef Kópavogsbæjar stendur að verkið setji mikinn svip á umhverfið og sé í alfaraleið gangandi og akandi vegfarenda í miðbæ Kópavogs.

Sigríður Björg Tómasdóttir, miðlunarstjóri hjá Kópavogsbæ, segir í tilkynningu vegna málsins að ákvörðunin um að nýta vegginn til upplýisngamiðlunar sé ekki af pólitískum toga heldur sé fyrst og fremst verið að reyna sem fjölbreyttastar leiðir til að upplýsa íbúa og önnur áhugasöm um framkvæmdir og uppbyggingu í miðbæ. Í því skyni hafa verið haldnir íbúafundir og settur upp vefur.

Tilkynninguna má sjá að neðan.

Upplýsingagjöf á vegg við Hálsatorg

Afráðið var í upphafi árs að nýta vegg við Hálsatorg undir upplýsingagjöf á vegum bæjarins í tengslum við uppbyggingu nýs miðbæjar, enda hentug staðsetning þar sem framkvæmdasvæði á Fannborgarreit skammt undan.

Veggurinn hefur frá árinu 2019 verið prýddur listaverki eftir Theresu Himmer. Gerður var samningur við listamanninn um tímabundið verk til þriggja ára. Lista- og menningarráð, sem í dag heitir menningar- og mannlífsnefnd, styrkti gerð verksins á sínum tíma. Áður hafði verið á því myndverk eftir ungmenni í sumarvinnu og þar áður hafði veggurinn verið ómálaður.

Þegar líða tók að framkvæmdum í nýjum miðbæ vaknaði sú hugmynd að nýta vegginn fyrir upplýsingagjöf, en lögð er mikil áhersla á að upplýsa sem best um fyrirhugaðar framkvæmdir. Í því skyni hefur einnig verið settur upp sérstakur upplýsingavefur sem unnin er í samstarfi framkvæmdaaðila og Kópavogsbæjar. QR-kóði á veggnum vísar áhugasömum á vefsíðuna.

Listamaðurinn, Theresa Himmer, var upplýst um að til stæði að mála yfir verkið og gerði hún enga athugasemd við það.

Kópavogsbær áréttar að ákvörðun um að nýta vegginn til upplýsingamiðlunar er ekki af pólitískum toga, heldur er fyrst og fremst er verið að reyna sem fjölbreyttastar leiðir til að upplýsa íbúa og önnur áhugasöm um framkvæmdir og uppbyggingu í miðbæ. Í því skyni hafa verið haldnir íbúafundir og settur upp vefur sem fyrr segir.

Fréttin var uppfærð 12. maí klukkan 11:30.

Styttur og útilistaverk Framsóknarflokkurinn Sveitarstjórnarkosningar 2026 Kópavogur Auglýsinga- og markaðsmál

Mest lesið

Fleiri fréttir