Vonast til að náttúran verði þeim hlið­holl

Frá því að neyðarstigi var lýst yfir í Grindavík og bærinn rýmdur vegna hættu á eldgosi í nóvember 2023 hefur hvorki leik- né grunnskóli verið starfandi í bænum. Í dag dvelja um fjögur hundruð og fimmtíu manns í bænum að jafnaði en nýlega var auglýst eftir skólastjóra yfir samræmdum leik- og grunnskóla í bænum. 

„Við fórum af stað með forskráningu sem var kannski fyrst og fremst til að meta raunverulega eftirspurn og kanna hvort það væri raunhæft að halda úti skólastarfi næsta haust. Tölurnar eru ekki endanlegar og verða í sjálfu sér ekki endanlegar fyrr en skóli hefst en við sjáum fyrir að það verði einhverjir tugir nemenda í leik- og grunnskóla sem búa þá hér í Grindavík næsta haust,“ segir Ásrún Helga Kristinsdóttir forseti bæjarstjórnar Grindavíkur.

Foreldrara um áttatíu barna hafi lýst yfir áhuga á að nýta sér leik- eða grunnskóla bæjarins og við því þurfi bærinn að bregðast. 

Sex sóttu um stöðu skólastjóra og í morgun var greint frá því að Guðlaug Erlendsdóttir hafi verið ráðin í stöðuna. Hún gegndi stöðu aðstoðarskólastjóra við Grunnskóla Grindavíkur í sjö ár.

Búið sé að taka ákvörðun um að hefja starfsemi leikskólans strax í ágúst en enn þá sé í skoðun hvort að innritað verði í grunnskólann í haust.

„Við héldum foreldrafund síðastliðinn þriðjudag og þar kom fram skýr vilji foreldra um að það yrði opnað hér í grunnskóla. Þannig að við erum alveg opin fyrir því og við komum til með að vinna þetta mál áfram með nýjum skólastjóra. Þetta byggist auðvitað allt á öryggi. Við erum mjög meðvituð um það. Þannig að það þarf að fara fram ítarlegt öryggismat og við erum að vinna í því. Hér er verið að vinna hörðum höndum í að gera bæinn öruggari.“

Hún Grindvíkinga tilbúna til að byggja upp bæinn aftur. 

„Við erum að opna tjaldstæðið og svo er úrslitakeppnin í körfunni fram undan, þannig að það er bara góð stemning hérna myndi ég segja. Svo vonumst við til þess að náttúran verði okkur hliðholl í þessum verkefnum fram undan.“