Mikið að gera á mörgum víg­stöðvum

Mikið að gera á mörgum vígstöðvum. Hellisheiði var lokað í dag og komu björgunarsveitarmenn fólki þar til aðstoðar. Þá var svipað upp á teningnum undir Hafnarfjalli í kvöld. Þar var veginum lokað og er hann enn lokaður þegar þetta er skrifað.

Fjórar björgunarsveitir voru kallaðar út vegna aðstæðna þar. Björgunarfélag Akraness, Björgunarsveitin Brák úr Borgarnesi, Björgunarsveitin Ok úr Borgarfirði og Björgunarsveitin Heiðar, sem er einnig úr Borgarfirði.

Undir Hafnarfjalli var mikill vindur og skafrenningur en á vef Björgunarfélag Akraness segir að bílar hafi runnið út af veginum vegna vindsins. Þá lentu ökumenn rútu og strætisvagns í vandræðum vegna veðursins og var töluverður fjöldi farþega í þeim bílum.

Jón Þór Víglundsson, upplýsingafulltrúi Landsbjargar, segir í samtali við Vísi að störfum björgunarsveita undir Hafnarfjalli virðist vera að ljúka en þar lentu þó nokkrir í vandræðum. Einn vörubíll var fastur, auk fólksbíla og annarra farartækja.

Opnað var fyrir fólk til að gista á Laxárbakka en ekki liggur fyrir hve margir þáðu það. Einn var fluttur á sjúkrahús vegna ofkælingar.

Svipuð staða var uppi í Öræfum í dag. Þar sem björgunarsveitarmenn komu föstu fólki til aðstoðar.

Þá voru sveitir á Siglufirði og Ólafsfirði einnig kallaðar út til að hjálpa fólki sem var fast í Strákagöngum á Siglufjarðarvegi. Þar voru allavega fjórir bílar fastir inni í göngunum. Einn vörubíl og fólksbílar en moksturstæki komst ekki framhjá þeim. Þá þurfti að ferja 24 til Siglufjarðar.

Lögreglan á Norðulandi Eystra segir snjóflóð hafa fallið á veginn rétt upp úr kvöldmat. Almenningi hafi verið lokað eftir það en nokkrir bílar hafi orðið innlyksa. Vegagerðin segir vegi á Siglufirði og í bænum ófæra.

Hægt er að fylgjast með lokunum og fregnum af færð og umferð hér á vef Vegagerðarinnar.