Snjó­koma og slydda fyrir norðan en þurrt fyrir sunnan

Í hugleiðingum veðurfræðings á vef Veðurstofu Íslands segir að alldjúp lægð skammt suðaustur af landinu fari nú norður og grafi um sig út af Langanesi. Sú lægð muni stýra veðrinu hér á landi fram að helgi.

Í dag er spáð norðan og norðvestan 8-15 m/s en hægari vindi sunnanlands. Von er á slyddu og snjókomu á norðanverðu landinu en lítilli úrkomu á sunnanverðu landinu. Svipaða sögu er að segja af morgundeginum en þá á að herða á vindi fyrir norðan með skafrenningi og slæmu skyggni.

Á föstudag er spáð stífri norðvestanátt með snjókomu eða éljum norðantil en þurru veðri sunnanlands.

Veðurhorfur á landinu næstu daga

Á föstudag:

Norðvestan 8-15 og snjókoma með köflum, en úrkomulítið syðra. Hiti breytist lítið.

Á laugardag:

Breytileg átt 5-13 og stöku él. Frost 0 til 7 stig. Gengur í hvassa austanátt seinnipartinn og um kvöldið, fyrst sunnantil, með snjókomu eða slyddu og hita kringum frostmark.

Á sunnudag:

Norðaustanátt og slydda eða snjókoma, en þurrt suðvestanlands. Hiti um eða yfir frostmarki, en kólnar síðdegis.

Á mánudag og þriðjudag:

Austan- og norðaustanátt og slydda eða snjókoma með köflum.