Ó­sam­mála um að það sé kostur að vera for­maður utan þings

Um næstu helgi hefst 38. flokksþing Framsóknar sem fer fram á Hilton Reykjavík Nordica og Framsóknarmenn velja sér nýja forystu. Það kemur síðan í ljós á sunnudag hvort það verður Lilja eða Ingibjörg sem ber sigur úr býtum og leiðir Framsókn inn í framtíðina.

Það er ekkert launungarmál að það verður á brattann að sækja fyrir þá sem verður valin formaður því flokkurinn hefur ekki verið að mælast með mikið fylgi. Í síðustu Maskínukönnun mældist flokkurinn með 7,1% en í síðasta Þjóðarpúlsi Gallup mældist flokkurinn með 5,4% fylgi.

Staða Lilju var mikið rædd í Pallborðsþættinum en hún náði ekki inn á þing í síðustu Alþingiskosningum árið 2024 og yrði hún því formaður utan þings ef flokksmenn Framsóknar velja hana sem leiðtoga næsta sunnudag.

Ingibjörg sagði að það væri stór hluti af starfi formanns að taka þátt í málstofu Alþingis og fjalla um stóru málin í samfélaginu.

„Ég veit að Lilja þekkir störf Alþingis mjög vel og ef hún er sannfærð um það að – eins og hún segir – að það sé hreinlega betra að formaður stjórnmálaflokks sem vill láta taka sig alvarlega og ná röddu og trausti almennings út á við að það sé betra að vera formaður utan þings þá held ég að hún sé að tala gegn betri vitund. Allt þinghaldið byggist á því að formaður stjórnmálaflokks sé á Alþingi og taki þátt í umræðunni og þegar kemur að því að því að rækta grasrótina að þá er það viðvarandi verkefni en ekki eitthvað sem þú byrjar á korter í kosningar.“

Lilja var ósammála þessu og sagði að í ljósi þess að flokkurinn væri í erfiðri stöðu væri nauðsynlegt að hugsa út fyrir kassann.

„Ég sagði að það gæti verið kostur í þessari stöðu að talsmaður Framsóknarflokksins gæti verið nokkuð frjáls í því að sinna grasrótinni betur af því að það þarf að endurræsa flokkinn og þú verður að gera það með öllu hjartanu og öllu sem þú átt til þess að ná þessari viðspyrnu.“

Hægt er að horfa á Pallborðsþáttinn í heild í spilaranum hér að neðan.