„Hef hvergi hallað réttu máli“

Í færslu sem hún skrifaði á Facebook segir Heiða að þegar henni fórust að berast fyrirspurnir um málið frá fjölmiðlum og öðrum um lögmæti framsals lóðaréttinda hafi lögfræðingi Umhverfis- og skipulagssviðs borgarinnar verið send fyrirspurn fyrir hennar hönd.

Sú fyrirspurn hafi hljóðað svo:

„Borgarstjóri óskar eftir upplýsingum um hvort rétt sé að óheimilt sé að framselja rétt sinn til lóðar til annars aðila sbr. eftirfarandi frétt heimildarinnar og hvernig þessu var háttað í viðeigandi tilfelli.“

Heiða segir að sama dag, fyrir um viku, hafi hún verið spurð af Morgunblaðinu hvort verið væri að skoða þessi mál hjá borginni og því hafi hún játað.

„Þegar frétt birtist á mbl þess efnis að verið væri að rannsaka mál Péturs af lögfræðingum ráðhússins bað ég, og minn aðstoðarmaður fyrir mína hönd, um leiðréttingu á fréttinni því engin eiginleg rannsókn væri í gangi. Ég spurði tveggja spurninga og var upplýst um reglurnar sem giltu og jafnframt í framhaldinu að engin aðilaskipti hefðu átt sér stað á lóðunum sem um ræddi. Engin breyting hefði orðið á málinu hvað borgina varðaði.“

Heiða segir að í kjölfarið hafi hún frábeðið öll fjölmiðlaviðtöl um málefni Péturs og þessara lóða. Enda sé óheppilegt að hún sé að fjalla um þau í fjölmiðlum, þar sem hún keppi við hann í prófkjöri.

Hún segist enn fremur hafa afhent fjölmiðlum spurningar sínar algerlega óhindrað og hafi hvergi hallað réttu máli. Ef samtal hennar við fréttamann Sýnar sé skoðað í heild sinni sjáist að hún lýsi þessari atburðarás nákvæmlega.

„Ég spurði um reglurnar og stöðuna á þessari úthlutun. Það að ég hafi látið framkvæma „rannsókn“ er algerlega úr lausu lofti gripið. Engin rannsókn er í gangi.“

Sjá einnig: Neitar að hafa sigað lög­mönnum borgarinnar á Pétur

Þá segir Heiða að þrátt fyrir prófkjör Samfylkingarinnar sé henni fullkomlega eðlilegt að afla sér upplýsinga um allt sem viðkomi hagsmunum borgarinnar og vita hvort reglum hafi verið fylgt.