Borgar­stjóri fór með rangt mál

„Nei, alls ekki,“ svaraði Heiða Björg í samtali við fréttastofu Sýnar fyrr í vikunni þegar fréttamaður spurði hvort það væri að hennar beiðni sem lögfræðingar borgarinnar könnuðu hvort Pétur, sem er mótframbjóðandi Heiðu í prófkjöri Samfylkingarinnar í Reykjavík, hefði mátt framselja hlut sinn í uppbyggingu á lóðum í Skerjafirði árið 2023.

Svör frá Reykjavíkurborg segja aftur á móti aðra sögu, en þar kemur fram að borgarstjóri hafi, með vísan til fréttar um mál Péturs, óskað eftir upplýsingum um hvaða reglur giltu um framsal lóðaréttar. Rúv greindi fyrst frá en Vísir hefur fyrirspurn borgarstjórans undir höndum.

Fyrirspurnin var send frá skrifstofu borgarstjóra til lögfræðinga á umhverfis- og skipulagssviði, sem könnuðu síðan málið.

Seldi félag sem átti byggingarrétt í Nýja-Skerjó 

Sala Péturs á fyrirtæki árið 2023 er orðin að einu stærsta bitbeini í oddvitaslag Samfylkingarinnar í höfuðborginni. Pétur er einn stofnenda félagsins HOOS 1, sem sigraði hönnunarsamkeppni Reykjavíkurborgar árið 2018 og fékk þannig úthlutaða lóð til íbúðauppbyggingar í Nýja Skerjafirði. Félagið greiddi tæpar 50 milljónir fyrir lóðina og átti að greiða 430 milljónir þegar hún yrði tilbúin. 

En Pétur og félagar ákváðu síðan að selja félagið árið 2023. Var það vegna mikilla tafa á áformunum að sögn Péturs. Enn eru engar framkvæmdir hafnar á umræddri lóð. Reykjavíkurborg sagði tafirnar vegna ágreinings ríkis og borgar um lóðina. 

Í byrjun janúar birti Heimildin umfjöllun um þetta félag en þar kom fram að Pétur hefði sagt sig úr stjórn samdægurs sem blaðamaður miðilsins spurði hann út í málið. Kom enn fremur að Pétur hefði þrýst á þáverandi borg­ar­stjóra að koma upp­bygg­ingunni í far­veg, jafnvel eftir að hann hefði selt félagið. Pétur þvertók samt þar fyrir að hann hefði átt hagsmuni af því að lóðauppbygging hæfist inni á skilgreindu flugvallarsvæði á Reykjavíkurflugvelli, en deilur hafa lengi staðið yfir milli ríkis og Reykjavíkurborgar vegna Reykjavíkurflugvallar í Vatnsmýri.

Pétur græddi 69 milljónir króna af sölunni sem hann sagði hafa að stórum hluta farið í launakostnað.

Heiða sagðist „ekkert vera að gramsa í þessu“ 

Síðustu helgi hafði mbl.is eftir Heiðu borgarstjóra að lögfræðingar Reykjavíkurborgar hefðu til skoðunar hvort Pétri hefði verið heimilt að framselja lóðarréttinn. 

Fram kemur í svari Reykjavíkurborgar við fyrirspurn Vísis að Heiða hafi föstudaginn 9. janúar óskað eftir upplýsingum um hvaða reglur giltu um framsal lóða. Rúv greindi fyrst frá fyrirspurn borgarstjórans.

„[B]orgarstjóri óskar eftir upplýsingum um hvort rétt sé að óheimilt sé að framselja rétt sinn til lóðar til annars aðila sbr. eftirfarandi frétt [H]eimildarinnar og hvernig þessu var háttað í viðeigandi tilfelli,“ sagði í fyrirspurn frá skrifstofu borgarstjóra til lögfræðinga á umhverfis- og skipulagssviði. Vísaði borgarstjóri þar til fyrrnefndrar fréttar Heimildarinnar um lóðarframsal Péturs.

Hún hafi sent þessa beiðni vegna þess að spurningarnar hefðu komið upp í viðtali á Útvarpi Sögu, auk þess sem umfjöllun Heimildarinnar hafi vakið upp spurningar, samkvæmt svari borgarinnar.

Í vikunni neitaði hún aftur á móti aðkomu sinni að málinu og sagðist ekki hafa vita nægilega mikið um málið til að tjá sig. 

„Þannig ég er ekkert að gramsa í þessu,“ sagði hún einnig í viðtali við Sýn á þriðjudag, 13. janúar.

Lögfræðingarnir komust að þeirri niðurstöðu að HOOS 1 ehf. ætti enn lóðarréttinn þó félagið væri ekki lengur í eigu Péturs og félaga enda hefði engin beiðni um aðilaskipti borist, samkvæmt svörum borgarinnar við fyrirspurn Vísis frá því fyrr í vikunni.