Lúsmý um allt land en bit­mýið einnig á­rásar­gjarnt

Gleðispillirinn og átvaglið víðfræga lúsmýið hefur snúið aftur af fullum þunga eftir að hafa legið í dvala tímabundið í köldu og vindasömu veðri í byrjun júní. Vágesturinn var töluvert fyrr á ferðinni í ár en áður á Suðurlandi vegna hitabylgju í maí áður en vorhret dró dilk á eftir sér.

Bitmýið einnig árásargjarnt

Þetta staðfestir Gísli Már Gíslason, vatnalíffræðingur og prófessor emeritus í dýrafræði við HÍ, í samtali við fréttastofu. Lúsmýið sé nú í öllum landshlutum og aðeins hægt að leita sér skjóls frá því þar sem vindasamt er.

„Þetta er komið um allt land nema þessi annes eins og á Vestfjörðum og á ytri hluta Snæfellsness og á Reykjanesi og fleiri annes. Bitmýið hefur líka verið ansi árásargjarnt upp á síðkastið. Það byrjaði seint í maí og hefur verið að klekjast út í ám um allt land og það er líka á Vestfjörðum og öllum annesjum.“

Alls staðar þar sem er logn gerir lúsmýið vart við sig.

„Ef það koma stilltir dagar, þar sem er logn og hlýtt þá blossar þetta upp og sækir mjög á fólk í skjólsömum görðum í sumarbústaðahverfum og annars staðar.“

Aðeins eitt geri gæfumuninn

Það sé því heppilegt að Íslendingar séu að venjast bitum lúsmýsins.

„Fyrstu þrjú árin eftir að lúsmýið kom, þá blés maður upp og var allur útsteyptur í litlum bólum en eftir þrjú ár þá varð maður varla var við þetta. Maður sá bitinn og kannski tugir bita á handarbakinu en maður fann lítið fyrir þessu. Lítinn kláða.

Spurður um góð ráð til að vinna bug á lúsmýinu ef það gerir vart við sig, segir Gísli aðeins eitt gera raunverulegan gæfumun.

„Við höfum verið með viftu í svefnherberginu og þá geta þær ekkert flogið gegn vindinum. Bara með svona venjulegri heimilisviftu. Þessi ilmefni hafa sennilega engin áhrif á flugurnar. Þær bíta fólk hvort sem það er með lavanderolíu eða ekki. Hátíðnihljóð hefur engin áhrif á þær.“