Skemmtiferðaskipi snúið vegna vinds

Vindhviður mældust yfir veðurviðmiðum um þrjúleytið og var hafnsögubáturinn Magni sendur út til skipsins. Hafnsögumaður Faxaflóahafna tók þar sameiginlega ákvörðun með skipstjóra skemmtiferðaskipsins um að snúa því við af öryggisástæðum.

„Því var snúið við áður en þau komu að þeim stað þar sem er ekki hægt að snúa við. Þetta var síðasti punktur til að taka ákvörðun því vindurinn gaf í aftur,“ sagði Gunnar Tryggvason, hafnarstjóri hjá Faxaflóahöfnum, í samtali við fréttastofu.

Sambærileg atvik um allt land síðustu daga

„Það sigldi út á Kollafjörðinn aftur og ætlar að dóla þar fram eftir degi. Miðað við veðurspá ættu þau að komast inn seinna í dag eða í kvöld,“ sagði Gunnar.

Skipum sé snúið við í tilfellum þessum svo þau sigli ekki í strand eða rekist utan í höfnina sem geti gerst ef eitthvað kemur fyrir vélina á leið inn. Slík atvik séu ekki óalgeng

„Svona atvik koma alltaf fyrir á hverju sumri, að vindar verði til þess að menn taki ákvörðun um breytingar. Oft er það til þess að menn sigla framhjá og sleppa viðkomunni. Það er búið að gerast um allt land síðustu tvo daga,“ sagði Gunnar.