Hnífurinn fannst í skotti for­ráða­manna

Stunguárásin á menningarnótt skók þjóðina og mikil umræða spratt upp um andlega líðan ungmenna og vopnaburð. Gerandinn sem þá var sextán ára gamall veittist með hníf að unglingum sem sátu saman í bíl við Skúlagötu og voru á heimleið eftir tónleika á Arnarhóli. 

Þrjú börn voru stungin og þeirra á meðal var Bryndís Klara sem lést af sárum sínum tæpri viku eftir árásina, aðeins sautján ára gömul.

Gerandinn var fyrrverandi kærasti einnar stúlkunnar í bílnum og hafði elt hana í gegnum staðsetningarapp í síma hennar.

„Það er aðdragandi þarna á milli aðila sem var gjörsamlega fyrir utan Bryndísi. Hún vissi ekkert um aðdragandann og hafði aldrei hitt gerandann,“ segir Birgir Karl Óskarsson, faðir Bryndísar.

„Þessi árás byrjar í framsætinu og Bryndís og vinkona hennar fara út úr bílnum, koma sér í skjól og gerandinn kemur þá aftur fyrir og inn um dyrnar þar og er að byrja að ráðast á stelpu. Bryndís fer til baka og er að toga hann út úr bílnum þegar hann snýr sér við og nær þessari einu stungu á versta stað.“

Gerandinn var handtekinn skömmu eftir árásina á heimili sínu og hefur verið ákærður fyrir manndráp og tilraun til manndráps. Forráðamenn hans voru einnig handteknir fyrir að hafa komið sönnunargögnum undan og grunaðir um hylmingu. 

Þau sendu drenginn í sturtu þegar hann kom heim, settu föt hans í þvottavél og komu undan hnífnum sem notaður var í árásinni. Samkvæmt heimildum fann lögregla hnífinn í bakpoka í skottinu á bíl forráðamanna hans. Mál þeirra var sent til héraðssaksóknara en síðar fellt niður vegna fjölskyldutengsla við drenginn en slíkt er refsilaust þegar um nána vandamenn er að ræða.

Foreldrar Bryndísar Klöru segja hana hafa verið einstaka stelpu. Sorgin sé óbærileg en þau reyna nú að beina henni í kærleiksríkan farveg í gegnum minningarsjóð sem þau hafa stofnað.

„Þetta hafði áhrif á svo rosalega marga sem þekktu okkur ekki neitt vegna þess að þetta hefði getað verið hver sem er og maður trúir því aldrei að maður lendi í svona sjálfur. En með sjóðnum getum við haldið hennar minningu á lofti og komið einhverju góðu til leiðar,“ segir Iðunn Eiríksdóttir, móðir Bryndísar. 

Birgir tekur undir. „Okkar eina ljós er að þetta geti orðið til einhvers. Það er ekkert annað gott sem getur komið út úr þessu nema að þetta muni bjarga einhverjum mannslífum.“

Foreldrar Bryndísar Klöru voru í ítarlegu og opinskáu viðtali í Kompás. Í spilaranum ofar í fréttinni má sjá þáttinn í heild sinni.