Dag­björt eyddi færslu eftir hörð við­brögð

Í færslunni gagnrýndi Dagbjört það að Guðmundur Ingi Guðbrandsson, félags- og vinnumarkaðsráðherra, hafi hringt í Sigríði Björk Guðjónsdóttur ríkislögreglustjóra þann 16. september í því skyni að afla upplýsinga um nóttina sem senda átti Yazan og fjölskyldu hans úr landi. Guðmundur sagði fyrr í dag að hann hafi ekki farið fram á að ríkislögreglustjóri stöðvaði brottflutninginn og að ekkert óeðlilegt hafi verið við símtalið. 

Líkir málinu við Lekamálið og Íslandsbankasöluna

Í færslunni spurði Dagbjört hvort að við sem samfélag vildum setja það í jákvætt samhengi að ráðherra stígi inn í einstök mál út frá pólitískum þrýstingi.

„Við verðum að geta sett þetta mál í samhengi við Lekamálið, Ásmundarsalsmálið eða bara Íslandsbankasöluna, sem voru mál sem öll áttu það sameiginlegt að ráðherrar höfðu óeðlileg afskipti af stjórnsýslunni,“ sagði í færslunni.

Sakar ráðherra um dyggðaskreytingu

Dagbjört ítrekaði þá að það væri mennska fólgin í því að treysta stjórnvöldum fyrir því að allir séu jafnir fyrir lögum. Hún tók fram að þegar ákvarðanir væru teknar um rétt fólks út frá lögum landsins ætti persónulegur vilji ekki að hafa þýðingu.

„Við eigum ekki að sætta okkur við svona dyggðaskreytingu af hálfu ráðherra, og hún er í raun algerlega óboðleg. Við tökum ekki stjórnsýslulögin úr sambandi þegar það hentar okkur.

Ég vona að umboðsmaður Alþingis taki málið til frumkvæðisathugunar og að samskipti ráðherra við ríkislögreglustjóra þessa nótt verði öllum ljós. Svona stjórnleysi má aldrei endurtaka sig,“ sagði í færslunni.

Færslan gagnrýnd og „ömurleg stefna“

Segja má að færslan hafi fallið í grýttan jarðveg  en þegar að þrjár klukkustundir voru liðnar frá því að færslan var birt höfðu nítján manns brugðist við henni og margar athugasemdir verið birtar við færsluna þar sem þingkonan var gagnrýnd fyrir málflutning sinn.

„Ömurleg stefna sem „jafnaðarflokkurinn“ er að stefna, mennskan er öll farin svo lengi sem þau fá sæti í ríkisstjórn,“ skrifaði einn Facebook-notandi við færsluna.

Aðrir veltu því upp hvort að Guðmundur ætti ekki að hafa heimild til að skipta sér af málinu þar sem málaflokkur fatlaðs fólks fellur undir hans ráðuneyti. 

„Ef þið viljið berja ykkur á brjóst og tala um óeðlileg afskipti af stjórnsýslu legg ég til að þið skoðið undanfara þess að barnið var sótt inn á spítala. Það átti að gera fordæmi úr honum, svona: Hér er engin miskunn sýnd,“ sagði Bergþóra Snæbjörnsdóttir rithöfundur í athugasemd og tók fram að öll atburðarásin sem átti sér stað þegar það átti að flytja Yazan úr landi hafi verið gagnrýnisverð. 

„Talar eins og sjálfhverfur popúlisti“

„Orðræðan sem þú beitir sýnir að hvorki þú né nokkur annar á Alþingi ætlið að taka á þeirri staðreynd að Guðrún Hafsteins beitir regluverkinu þannig að það stangast á við mannréttindi, landslög og alþjóðalög.

Þetta er „double speak“ af verstu gerð og algjört rof við raunveruleikann. Það er vandræðalegt fyrir þig að skrifa svona opinberlega, því þú ert ekki að tala fyrir almannaheill, mannrettindum eða raunverulegri ábyrgð í stjórnsýslu. Þú talar eins og sjálfhverfur popúlisti,“ sagði í enn annarri athugasemd.

Fjölmargir fleiri lýstu því yfir að afstaða Dagbjartar í málinu væri dapurleg en stuttu síðar fjarlægði hún færsluna af Facebook.