Umfangsmesta mál sinnar tegundar á sviði meðhöndlara

Osteópatafélag Íslands og Sjúkranuddarafélag Íslands segja félagsmenn í gegnum tíðina hafa heyrt sögur af meðhöndlaranum sem hefur verið kærður nokkrum sinnum á árinu fyrir kynferðisbrot í meðferð.

„Þessi félög finna sig knúin til að tjá sig um málið og verja sína félagsmeðlimi. Meðlimir innan allra félaganna hafa heyrt fjöldann allan af sögum frá skjólstæðingum sínum um óeðlilega starfshætti frá þessum manni. Við höfum fengið til okkar fólk sem hafa leitað álits um það hvort aðferðir sem hann beitir þyki eðlilegar. Við fordæmum svona starfsaðferðir,“ segja félögin tvö.

Félögin segja það alvarlegt að ekkert eftirlit sé með starfsemi utan heilbrigðisgeirans. Leið vanti til að tilkynna aðila sem ekki heyra undir nein félög. Maðurinn sé ekki meðlimur í ofantöldum félögum.

„Að okkar mati er hér um að ræða mjög alvarlegt mál og umfangmesta sinnar tegundar á sviði meðhöndlara hér á landi. Við höfum samúð með þessum konum og vonum að réttlæti náist hjá þeim.“

Egill Þorsteinsson, formaður Kírópraktorafélags Íslands, segir meðlimum félagsins brugðið vegna málsins. „Stétt kíróprakt­ora er slegin yfir þessum fréttum. Maður sá sem kærður er, hefur ekki menntun kírópraktors, er ekki meðlimur í Kírópraktorafélagi Íslands og tengist ekki stétt kírópraktora á nokkurn hátt.“

Maðurinn hefur verið kærður fyrir kynferðisbrot gegn nokkrum konum sem voru í meðferð hjá honum en hann á meðal annars að hafa meðhöndlað þær í gegnum leggöng þeirra. Eftir umfjöllun Fréttablaðsins um málið á fimmtudag stigu fram fjórar konur í kjölfarið samdægurs og í gær bættust þrjár í hópinn. Samtals eru konurnar orðnar sautján.

„Til mín hafa nú leitað alls sautján konur. Sjö þeirra hafa nú þegar mætt í skýrslutöku hjá lögreglunni og þrjár hafa beðið þess að gefa skýrslu síðan í apríl. Nokkrar eru að meta stöðu sína,“ segir Sigrún Jóhannsdóttir, lögmaður og ­réttargæslumaður kvennanna.

„Frá því að fréttaflutningurinn fór af stað hafa svo sjö konur haft samband við mig til viðbótar og lýst því fyrir mér hvernig umræddur maður mun hafa brotið á þeim. Ég hef fengið nokkrar á fund til mín nú þegar en hinar koma næstu daga,“ bætir Sigrún við.

Steinbergur Finnbogason, lögmaður mannsins, segir fátt annað í stöðunni en að spyrja að leikslokum.

„Umræðan er að þróast og vinda upp á sig í takti við þá múgsefjun sem ég tel að stefnt hafi verið að frá upphafi. Fyrir minn skjólstæðing er fátt annað í stöðunni en að spyrja að leikslokum. Hann kemur af fjöllum en verður að treysta á faglega rannsókn og ef til vill úrskurð dómstóla. Stríðið á Alþingi götunnar er tapað eins og öll önnur í svona málum,“ segir Steinbergur.

Látinn hætta í World Class eftir tæpa viku

Maðurinn starfaði í stuttan tíma hjá líkamsræktarstöðinni World Class fyrir um fimm árum. Þar átti hann að meðhöndla og hnykkja viðskiptavini en var fljótlega látinn fara eftir að stöðinni barst kvörtun um kynferðislega áreitni af hálfu mannsins. Þetta staðfestir Björn Leifsson, eigandi World Class.

„Þessi maður kom til okkar og það var ekki vika liðin frá því að hann hóf störf þegar við þurftum að láta hann fara vegna þessa,“ segir Björn. „Hann var því látinn fara strax.“

Konráð Valur Gíslason, einkaþjálfari hjá World Class, segir að þrjár konur hafi sagt sér frá slíkri meðferð hjá manninum.

„Þetta kom upp þegar ung stúlka, um 16-17 ára, var í meðferð hjá honum þegar hann starfaði hjá World Class. Eftir meðferðina sagði hún kærasta sínum frá sem hringdi hingað inn og kvartaði yfir manninum,“ segir Konráð. „Ég vissi af þremur konum í þjálfun hjá mér sem höfðu farið til hans og lent í einhverju misjöfnu.“