„Ég var skelfingu lostinn“

Snjóflóðahætta er enn í gildi á norðanverðum Vestfjörðum en þó nokkur snjóflóð hafa fallið þar síðan í gær. Óvissustig ríkir á Tröllaskaga og í Eyjafirði. Ófært er um Flateyrarveg og Súðavíkurhlíð og þá var Holtavörðuheiði einnig lokað í gær en hún var opnuð rétt fyrir hádegi eftir að búið að var að fjarlægja ökutæki sem festust þar í gær.

Ólíver Hilmarsson, ofanflóðasérfræðingur hjá Veðurstofu Íslands, segir að verulega muni draga úr veðrinu á Vestfjörðum í dag. Hann bendir á að ekki sé snjóflóðahætta við byggð. Mikilvægt sé að hafa varann á undir bröttum hlíðum.

„Það hafa verið að falla flóð á vegi við Súðavíkurhlíð. Það féll á vegrás á Eyrarhlíð á Vestfjörðum. Það er óvissustig núna á Ólafsfjarðarvegi og Siglufjarðarvegi. Það er verið að vinna að opnun á Flateyrarvegi. Súðavíkurhlíð er enn þá lokuð vegna snjóflóðahættu. Það má reikna með að hættan aukist á Siglufjarðarvegi í dag og hann muni lokast.“

Óttaðist um líf sitt

Einn af þeim sem lentu í hremmingum í gær vegna færðar er Davíð Pierre Milesi Gaches sem fékk lítið snjóflóð á hlið ökutækis síns á leið sinni frá Ísafirði til Súðavíkur rétt áður en veginum var lokað í gær. Hann hafnaði síðan ofan á stærra snjóflóði sem hafði þverað veginn rétt áður.

„Skyndilega finn ég fyrir miklum þrýstingi á hægri hlið ökutækisins og mér er ýtt til hliðar í átt að hafinu. Það býst auðvitað enginn við þessu. Eftir það missti ég stjórn á bílnum en reyndi að halda mér á veginum. Þá hafnaði ég ofan á öðru snjóflóði. Ég veit ekki hvort snjórinn hafi verið á veginum fyrir eða hvort snjóflóðið hafi fallið einmitt á þessum tíma. Ég vissi ekkert hvað var að gerast, hvorki hvað sneri upp né niður.“

Davíð keyrir reglulega um þessar slóðir þar sem hann vinnur við að rannsaka fuglalíf og seli á svæðinu en hann vinnur jafnframt sem sundlaugarvörður á Súðavík þar sem hann býr. Hann hefur þó aldrei óttast um líf sitt líkt og í gær.

„Ef þú ferð aðeins til vinstri endarðu á grjótinu eða ofan í sjó. Það er ekki mikið svigrúm þarna til að halda sér öruggum ef eitthvað kemur upp á. Þú sérð meira að segja ekki hvar vegurinn er í þessum aðstæðum. Í augnablikinu leið mér ágætlega vegna adrenalíns og spennu. Ég var skelfingu lostinn yfir því að annar bíll gæti keyrt á minn, því ég var ekki viss um að ég væri nógu sýnilegur. En ég áttaði mig fyrst á þessu þegar ég kom heim,“ segir Davíð sem tekur fram að lukkulega hafi hann getað haft samband við lögregluna og stuttu síðar gat Vegagerðin og björgunarsveitin hjálpað honum að komast leiðar sinnar. 

„Björgunarsveitin í Súðavík kom fljótt á staðinn og tókst að draga bílinn minn út og hreinsa veginn. Hins vegar voru margir bílar þegar að bíða eftir að keyra til Ísafjarðar. Hvað hefði gerst með þessa röð bíla ef fleiri snjóflóð hefðu fallið? Ég hef aldrei verið svona nálægt því að sjá ljósagöng, en ég myndi miklu frekar vilja sjá göng á milli Súðavíkur og Ísafjarðar,“ segir hann í Facebook-færslu um atvikið.

Nóg um að vera hjá björgunarsveitum

Jón Þór Víglundsson, upplýsingafulltrúi Landsbjargar segir að nóg hafi verið um verkefni hjá þeim í gær og í morgun. Opna þurfti fjöldahjálparstöð í Reykjaskóla norðan við Holtavörðuheiði í gær þar sem fjölmargir bílar festust.

„Það var ansi mikill hvellur á Holtavörðuheiðinni þar sem 24 ferðalangar voru fluttir norður af heiðinni, einn suður af. Þessir 24 fóru í Reykjaskóla þar sem tekið var á móti þeim með kostum og kynjum og uppbúin rúm biðu þeirra.“