Eins til tveggja ára bið eftir ADHD-greiningu: „Ekki spurning að þetta getur haft á­hrif á vel­líðan og náms­árangur“

Embætti landlæknis birti á dögunum fréttabréf þar sem fram koma upplýsingar um geðheilbrigðisþjónustu fyrir börn.

„Það hefur orðið mikil aukning á tilvísunum til Geðheilsumiðstöðvar barna alveg frá árinu 2022 og það er í samræmi við alþjóðlega þróun. Við sjáum þessa þróun á Norðurlöndum, sjáum hana líka í Bertlandi,“ segir Linda Kristmundsdóttir forstöðumaður Geðheilbrigðismiðstöðvar barna.

„Einhverjir sem bíða skemur og einhverjir lengur“

Börnum á biðlista eftir þjónustu BUGL hefur fækkað og Linda segir að hluta af fjölgun tilvísana til Geðheilsumiðstöðvar megi rekja til tilfærslu á þjónustu.

Í lok síðasta árs voru rúmlega 2600 börn á biðlista eftir þjónustu hjá Geðheilsumiðstöð barna og hafði meirihluti þeirra beðið lengur en eitt ár.

„Við erum með forgangslista og við reynum alltaf að meta alvarleika einkenna. Þannig að það eru einhverjir sem bíða skemur og aðrir bíða lengur. En að meðaltali þá er biðtíminn eftir ADHD-greiningu svona eitt til tvö ár.“

Fólk geti leitað til sveitarfélaga eftir aðstoð

Geðheilsumiðstöð er eina opinbera stofnunin sem greinir ADHD. Börn þurfa oft á tíðum fyrst að bíða eftir frumgreiningu og síðan aftur til að komast að hjá Geðheilsumiðstöð.

„Það er ekki spurning að þetta getur haft áhrif á vellíðan barna og námsárangur til dæmis, þannig að við erum ekki ánægð með þessa stðu. En það er mikil vinna í gangi í heilbrigðisráðuneytinu að skoða þessa stöðu og það hafa heilmiklar úrbætur verið gerðar,“ segir Linda.

Til dæmis hafi verið bætt við sérfræðingum og sett á fót lyfjafræðsla fyrir foreldra sem getur nýst á meðan beðið er.

„Við leggjum áherslu á að þegar við fáum tilvísun að ábyrgð á máli barnsins er á höndum tilvísanda þar til það kemst að hjá okkur. Þannig að fólk á að geta leitað til þjónustumiðstöðva og sveitarfélaga eftir aðstoð,“ segir Linda að lokum.