Deildi nöfnum skjól­stæðinga á Instagram

Frá þessu er sagt í frétt Gímaldsins og er haft eftir upplýsingafulltrúa Útlendingastofnunar að trúnaðarbrot séu litin alvarlegum augum.

Umræddur starfsmaður er sagður hafa deilt nöfnunum í lokuðum hópi á Instagram. Þar deildi hann handskrifuðum verkefnalistum sínum í vinnunni, þar sem mátti sjá nöfn skjólstæðinga.

„Stofnunin lítur brot á trúnaði mjög alvarlegum augum og hafa þau afleiðingar í samræmi við alvarleika máls. Stofnunin mun að öðru leyti ekki tjá sig frekar um þetta mál að svo stöddu,“ segir í skriflegu svari Þórhildar Hagalín, upplýsingafulltrúa Útlendingastofnunar, við fyrirspurn fréttastofu Sýnar. 

Hún bætir við að málið sé nú til skoðunar innan stofnunarinnar. Stofnunin hafi aðeins haft upplýsingar um málið frá því á fimmtudaginn.

Einu sinni deildi starfsmaðurinn sjálfsmynd þar sem einnig voru tveir verkefnalistar með nöfnum skjólstæðinga. Starfsmaðurinn hafði þá hakað við nöfnin og stærði sig af því að hafa skilað af sér góðu verki þann daginn.

Nokkur skilaboð virðast hafa verið þess eðlis, miðað við umfjöllun Gímaldsins, þar sem starfsmaðurinn stærði sig af því að hafa lokið verkefnum sem tengdust skjólstæðingum sem voru nafngreindir á myndunum.

Í svari við fyrirspurn Gímaldsins til Útlendingastofnunar segir að rík áhersla sé lögð á vernd persónuupplýsinga þar. Vinnsla þeirra sé þó nauðsynleg starfsemi stofnunarinnar.

Enn fremur segir að starfsfólk Útlendingastofnunar sé bundið þagnarskyldu samkvæmt lögum. Þau og reglur þar að lútandi séu kynntar starfsmönnum sem hefja þar störf.