Fjöldi gesta á vellinum myndi tak­markast við 5000

Þetta kemur fram í umsögn lögreglunnar sem birt var í Skipulagsgátt í gær. Þar segir að aðkomuleiðir bæði að Laugardalsvelli og öðrum íþróttasvæðum í Laugardalnum séu nú þegar flóknar og í einhverjum tilfellum seinfarnar.

Því sé afar líklegt að útkallstími lögreglunnar á höfuðborgarsvæðinu lengist til muna verði af fyrirhuguðum breytingum. Þar með sé öryggi gesta á Laugardalsvelli stefnt í hættu. Lögreglan leggur áherslu á að tvær virkar aðkomuleiðir hið minnsta verði tryggðar við völlinn og segir það bæði eiga við þegar um ræði hefðbundna notkun og stærri viðburði þegar töluvert meiri mannfjöldi sé á svæðinu.

„Á tónlistarviðburðum á Laugardalsvelli hafa komið allt að 20.000 manns. Ef um eina virka aðkomuleið verði að ræða sér [lögreglan á höfuðborgarsvæðinu] ekki annað en að fjöldi gesta verði einskorðaður við 5000 gesti hvort sem um sé að ræða tónlistarviðburði eða knattspyrnuleiki/landsleiki, að öðrum kostum er öryggi gesta ekki tryggt,“ segir í umsögn lögreglunnar.