Gömlum Flugfélagsþristi bætt við á Sólheimasand

Í fréttum Sýnar var sýnt beint frá flutningnum. Flugvélin var fyrr í dag dregin út úr flugskýli á Keflavíkurflugvelli þar sem hún hefur verið í geymslu undanfarin átján ár. Til að koma henni út af flugvallarsvæðinu þurfti að hífa hana yfir flugvallargirðinguna þar sem hún komst ekki í gegnum hlið vallarins.

Flugvélarskrokkurinn verður í kvöld fluttur á vörubílspalli í lögreglufylgd um Grindavík og Suðurstrandarveg, um Óseyrarbrú og síðan um Suðurlandsveg um Þjórsárbrú að áfangastað á Sólheimasandi. Vængirnir eru hafðir á tveimur öðrum vörubílum. Áætlað er að bílalestin leggi af stað frá flugvellinum klukkan 22.

Flugvélin þjónaði lengst af í innanlandsflugi Flugfélags Íslands, hét Gunnfaxi og var með skrásetningarstafina TF-ISB. Gunnfaxi flaug síðast árið 1976 en var þá gefinn Landgræðslunni til að nota í varahluti fyrir Pál Sveinsson. Þegar svo Þristavinafélagið fékk Pál Sveinsson að gjöf árið 2005 fylgdi Gunnfaxi með.

„Hún var orðin fyrir hérna þannig að við urðum að fjarlægja hana héðan. Við fundum sem betur fer menn sem vilja gera eitthvað fyrir vélina og sýna hana og varðveita,” segir Tómas Dagur Helgason, formaður Þristavinafélagsins.

Benedikt Bragason, bóndi á Ytri-Sólheimum, segir að flugvélinni verði ekið beint niður á Sólheimasand í kvöld.

„Já, já. Við ætlum að drífa hana þangað. Ekki eftir neinu að bíða,” svarar Benedikt en á sandinum er þegar fyrir flak Varnarliðsflugvélar sem þar brotlenti árið 1973.

„Ætli við bætum henni ekki bara við. Við ætlum að gera þessa eins vel útlítandi og hægt er og helst að koma henni í það útlit sem Varnarliðsvélin var þegar hún lenti.”

-En að fara með gamalt flak út í íslenska náttúru, niður á sand. Þetta er dálítið umdeilt. Gera menn ekki athugasemd við þetta?

„Ég veit það ekki. Landeigendur standa allir saman að þessu og þeir eru sáttir við þetta. Við höfum svo sem ekki miklar áhyggjur af því hvað öðrum finnst.

Þetta er bara eins og gengur og gerist. Hver hefði trúað því að flugslys væri orðið eitt helsta aðalaðdráttarafl íslenskrar náttúru?” svarar Benedikt.

En hefði ekki komið til greina að varðveita flugvélina í upprunalegum litum til dæmis innanhúss á Samgöngusafninu á Skógum? 

Þeirri spurningu svarar formaður Þristavinafélagsins í frétt Sýnar, sem sjá má hér: