Hætta áætlunar­flugi til Húsa­víkur í næsta mánuði

Norlandair tók við áætlunarflugi til Húsavíkur með samningi við Vegagerðina í byrjun desember. Flogið hefur verið fjórum sinnum í viku á milli Húsavíkur og Reykjavíkur.

Fulltrúar flugfélagsins greindu byggðaráði Norðurþings á fundi þess í dag að það ætlaði ekki að halda fluginu áfram eftir að samningurinn rennur út 15. mars.

Í fundargerð byggðaráðsins kemur fram að það telji að samningurinn hafi verið gerður til of skamms tíma. Nýting ferðanna hafi verið góð og lítið vantað upp á til að tryggja flug til Húsavíkur allt árið um kring.

„Byggðarráð skorar á ráðherra samgöngu- og sveitarstjórnarmála að tryggja samninga um áætlunarflug til Húsavíkur allt árið,“ segir í fundargerðinni.