„Michael Schumacher hélt að ég ætlaði að drepa hann“

David Coulthard ræðir þar meðal annars sérstaklega árekstur þeirra í belgíska kappakstrinum árið 1998.

Coulthard og Schumacher rifust harkalega eftir kappaksturinn. Schumacher var brjálaður út í Bretann og neitaði að sætta sig við að þetta hafi verið slys.

„Michael Schumacher hélt að ég ætlaði að drepa hann. Að ég hefði gert þetta viljandi til að hjálpa liðsfélaga mínum Mika (Häkkinen),“ sagði David Coulthard í nýju heimildarmyndinni „Being Michael Schumacher“ sem þýska sjónvarpsstöðin ARD framleiðir.

Michael Schumacher keyrði aftan á bíl Coulthard við blautar og mjög erfiðar aðstæður. Eftir það var Coulthard og bíllinn hans úr leik.

„Þetta var bara slys og svona hlutir gerast. Ef ég er vingjarnlegur þá get ég sagt að við höfum báðir átt jafnmikla sök en ef ég er raunsær og hreinskilinn þá var þetta slys 95 prósent Schumacher að kenna,“ sagði Coulthard. Með því að smella hér má sjá þennan árekstur og viðbrögð Schumacher.

Það eru margir sem bíða spenntir eftir frumsýningu heimildarþáttanna í lok desember en þættirnir verða fimm talsins. Margir vonast þar til að fá einhver svör um stöðuna á sjöfalda heimsmeistaranum sem er nú orðinn 54 ára gamall.

Michael Schumacher slasaðist í frönsku Ölpunum í desember 2013. Frá þeim tíma hefur staðan á heilsu hans verið haldið leyndri fyrir almenningi.

Meðal þeirra sem rætt verður við í þáttunum eru Ralf Schumacher, Lewis Hamilton, Fernando Alonso, Ross Brawn, Norbert Haug og Jean Todt. Þá eru einnig viðtöl við Dirk Nowitzki og Bastian Schweinsteiger. Hér má sjá upplýsingar um þættina.

Hægt er að nálgast þættina í ARD sarpinum frá 14. desember en fyrstu þáttur verður frumsýndur 28. desember. Upplýsingar má finna hér.