Innlent

Skýrist væntan­lega í dag hvernig stjórn­völd hyggjast rann­saka Hjalt­eyrar­málið

Berghildur Erla Bernharðsdóttir skrifar
Áslaug Arna Sigurbjörnsdóttir dómsmálaráðherra og Katrín Jakobsdóttir forsætisráðherra. Það skýrist væntanlega í dag með hvaða hætti stjórnvöld koma að rannsókn á Hjalteyrarmálinu svokallaða.
Áslaug Arna Sigurbjörnsdóttir dómsmálaráðherra og Katrín Jakobsdóttir forsætisráðherra. Það skýrist væntanlega í dag með hvaða hætti stjórnvöld koma að rannsókn á Hjalteyrarmálinu svokallaða. Vísir/Vilhelm

Forsætisráðuneytið og dómsmálaráðuneytið vinna saman að því með hvaða hætti stjórnvöld geta komið að rannsókn á starfsemi vist-og meðferðarheimila þar sem grunur er um að börn hafi orðið fyrir ofbeldi. Það skýrist væntanlega í dag hver niðurstaðan verður.

Síðustu daga hefur fólk stigið fram og lýst hræðilegu ofbeldi sem það varð fyrir á barnaheimli hjónanna Einars og Beverlyar Gíslason á Hjalteyri á áttunda áratug síðustu aldar. Hjónin voru síðar með dagvistun og leikskóla í Garðabæ á árunum 1998-2015.

Eftir umfjöllun í fjölmiðlum um heimilið hafa bæjarstjórar á Akureyri og Garðabæ lýst yfir mikilvægi þess að starfshættir hjónanna verði rannsakaðir. Fram kom á vef Garðabæjar í gær að vinna væri hafin við að afla nánari upplýsinga um störf hjónanna í Garðabæ.

Jón Björnsson sem var félagsmálastjóri á Akureyri gerði á sínum athugasemdir við starfsemi Hjalteyrarheimilisins hefur sagt eftir að málið kom upp að ósanngjarnt sé að rannsaka ekki heimilið.

Halldór Þormar Halldórsson umsjónarmaður sanngirnisbóta sagði í fréttum okkar í gær að rétt væri að endurvekja vistheimilisnefnd vegna ásakana um illa meðferð á Hjalteyrarheimilinu en líka á öðrum heimilum sem vistuðu börn. Vistheimilisnefnd hafi ekki klárað öll málin sem komu upp.

Ennþá á eftir að rannsaka margar ábendingar og heimili

Samkvæmt heimildum fréttastofu hafa meðal annars komið fram athugasemdir um illa meðferð á börnum á síðustu öld á Vöggustofu Thorvaldsen, barnaheimilinu Vorboðanum að Rauðhólum, í Laugarnesskóla, á upptökuheimili að Dalbraut í og vistheimili við Njörvasund en bæði síðastnefndu heimilin voru í Reykjavík.

Katrín Jakobsdóttir forsætisráðherra sagði í fréttum okkar í gær að full ástæða væri til að fara yfir málefni Hjalteyrarheimilisins. En ekki kom skýrt fram hver ætti að gera það.

Fréttastofa hefur síðustu daga reynt að fá svör við hver eða hvort stjórnvöld hyggjast rannsaka illa meðferð á börnum á Hjalteyri og síðar feril hjónanna í Garðabæ. Í fyrirspurnum hefur komið fram að það sé á hendi dómsmálaráðuneytisins að ákveða hvort farið verður í slíka rannsókn. 

Samkvæmt heimildum fréttastofu hefur nú verið ákveðið að forsætisráðuneytið og dómsmálaráðuneytið vinni saman að lausn í málinu. Það skýrist væntanlega í dag hver niðurstaðan verði.

Barnaheimilið á Hjalteyri Hörgársveit Akureyri Reykjavík Kynferðisofbeldi

Tengdar fréttir

„Full ástæða til að fara yfir málefni Hjalteyrarheimilisins“

Forsætisráðherra bendir á að athugasemdir hafi verið gerðar nokkrum sinnum gegnum tíðina við  Hjalteyrarheimilið án þess að hjónin þar hafi verið stöðvuð. Hún telur fulla ástæðu til að rannsaka heimilið eftir það sem nú er komið fram. Það sé þó dómsmálaráðuneytið sem ákveði að taka upp slíka rannsókn. 

Vill láta rannsaka málefni Hjalteyrarheimilisins

Bæjarstjóri Akureyrar telur að rannsaka eigi málefni barnaheimilisins á Hjalteyri eftir að fólk sem þar dvaldi sem börn hefur stigið fram. Þar lýsir fólkið hræðilegu kynferðislegu,líkamlegu og andlegu ofbeldi sem það varð fyrir. 

Barnaverndarráð Íslands sópaði kvörtunum út af borðinu

Fyrrverandi félagsmálastjóri Akureyrar segir Barnaverndarráð Íslands ekki hafa tekið kvartanir  sínar um barnaheimilið á Hjalteyri alvarlega. Málinu hafi verið sópað út af borðinu. Hefði hann vitað af kynferðislega ofbeldinu sem nú hefur verið greint frá hefði málið alltaf verið kært til lögreglu. 

Garða­bær mun rann­saka dag­heimili hjónanna frá Hjalt­eyri

Bæjarstjóri Garðabæjar segir að starfsemi hjóna, sem ráku barnaheimili á Hjalteyri á áttunda áratugnum, við barnagæslu í Garðabæ verði rannsökuð. Bærinn taki frásagnir um ofbeldi af hálfu hjónanna mjög alvarlega og starfsemi þeirra verði rannsökuð af viðeigandi aðilum. 

„Þetta var hreinasta helvíti“

Maður sem sætti miklu ofbeldi af hálfu hjóna sem ráku barnaheimili á Hjalteyri á áttunda áratug síðustu aldar segir stórundarlegt að hjónin hafi áfram fengið leyfi til að gæta barna í Garðabæ. Foreldrar barna sem voru með börn sín í vistun hjá þeim eru ósáttir við að Garðarbær hafi ekki stöðvað hjónin.

Martröðin á barnaheimilinu á Hjalteyri

Kynferðislegt, líkamlegt og andlegt ofbeldi tíðkaðist árum saman gagnvart börnum sem dvöldu hjá hjónum sem ráku barnaheimili á Hjalteyri í Hörgársveit á áttunda áratug síðustu aldar. Fólk sem þar var sem börn hefur ítrekað, án árangurs, reynt að ná eyrum yfirvalda til að fá heimilið rannsakað. Prestar sem voru í barnaverndarnefndum á sínum tíma gáfu heimilinu samþykki sitt þrátt fyrir að hafa fengið ábendingar um að þar væri ekki allt með felldu.

Mest lesið


Fleiri fréttir

Sjá meira


×

Mest lesið