Hamilton gagnrýnir framkomu stjórnvalda gagnvart LGBTQ+ fólki

Þjóðaratkvæðagreiðsla er fram undan í Ungverjalandi vegna laga sem segja meðal annars til um ungmennum sé meinað um fræðslu um samkynhneigð. Lögin hafa þegar verið samþykkt af ungverska þinginu en Evrópusambandið er með málið til skoðunar.

Haft hefur verið eftir Viktori Orban, forsætisráðherra Ungverjalands, að stefnan sé málefni Ungverjalands en ekki embættismanna í Brussel.

Lewis Hamilton, sjöfaldur heimsmeistari í Formúlu 1 og liðsmaður Mercedes, nýtti tækifærið í aðdraganda kappakstursins sem fer fram í Ungverjalandi um helgina til að gagnrýna stjórnvöld í landinu.

„Það er óásættanlegt, huglaust og villandi fyrir valdhafa að leggja slíkan lagabálk til,“ segir Hamilton. „Allir eiga skilið frelsi til að vera þeir sjálfir, sama hverja þeir elska eða hvernig þeir skilgreina sjálfa sig,“

„Ég hvet ungversku þjóðina til að kjósa með vernd réttinda fólks í LGBTQ+ samfélaginu í komandi kosningu. Þau þurfa á okkar hjálp að halda, nú meir en nokkru sinni fyrr.“ sagði Hamilton enn fremur.

Þjóðverjinn Sebastian Vettel, bílstjóri fyrir Aston Martin, tók í sama streng: „Mér finnst vandræðalegt að ríki í Evrópusambandinu skuli kjósa um lög af þessu tagi,“

Ungversk stjórnvöld hlutu mikla gagnrýni á meðan Evrópumótinu í fótbolta stóð í sumar, þar sem fjórir leikir fóru fram í Búdapest. Evrópska knattspyrnusambandið, UEFA, setti ungverska landsliðið í þriggja leikja áhorfendabann eftir mótið vegna níðandi hegðunar stuðningsmanna í garð samkynhneigðra.

Hamilton hefur unnið Formúlu 1-titilinn sex af síðustu sjö árum en hefur hlotið meiri samkeppni ár en síðustu misseri. Max Verstappen leiðir keppni ökuþóra en Hamilton minnkaði forskot hans í síðasta kappakstri í Bretlandi úr 33 stigum í átta. Hamilton vann keppnina eftir að hafa farið utan í Verstappen á fyrsta hring með þeim afleiðingum að Hollendingurinn gjöeyðilagði bíl sinn og lauk keppni.

Red Bull, lið Verstappens, vildi harðari refsingu en þær 10 sekúndur sem Hamilton fékk í keppninni, en áfrýjun þeirra var hafnað. Spennan er því mikil í baráttunni um heimsmeistaratitilinn.