Páskaeggin ódýrust í Bónus

Verðlagseftirlit ASÍ framkvæmdi á dögunum verðkönnun, meðal annars á páskaeggjum. Verslanir Bónus voru í flestum tilfellum með lægstu verðin eða í 28/30 tilfellum. Super 1 var hins vegar oftast með hæstu verðin eða í 13 af 30 tilfellum.

Munur á hæsta og lægsta verði nam oft hundruðum króna en mest munaði 1400 krónum á sama páskaegginu milli verslana. Sjö af þrjátíu páskaeggjum sem skoða átti voru til í Kjörbúðinni en engin páskaegg reyndust til í Costco.

„Af páskaeggjum var verðmunurinn mestur á litlum rís páskaeggjum frá Freyju, fjórum saman í pakka eða 67% en lægst var verðið í Bónus, 359 kr. en hæst í Hagkaup 599 kr. Í krónum talið var verðmunurinn mestur á Nóa Siríus risa páskaeggi, 1.401 kr. eða 25%. Lægst var verðið í Bónus 5.598 kr. en hæst var verðið 6.999 kr. í Super 1. Þá var 28% munur á hæsta og lægsta verði á Nóa Siríus eggi nr.7. Lægst var verðið í Bónus, 3.579 kr. en hæst, 4.599 kr. í Super 1 en það gerir 1.020 kr. verðmun.“ segir í tilkynningu frá ASÍ.

Þá var einnig litið á hilluverð annarar matvöru en páskaeggja.

Mikill verðmunur var á matvöru, í 45 tilfellum af 117 var verðmunur yfir 41%. „Þar má nefna 170% verðmun á nautgripahakki sem kostaði minnst 853 kr. í Super 1 á tilboði en mest 2.999 kr. í Hagkaup og nemur verðmunurinn því 1.446 kr. Hamborgarahryggur með beini var 140% dýrari í Fjarðarkaup þar sem verðið var hæst, 2.398 kr. en í Nettó þar sem verðið var lægst, 999 kr. en það gerir 1.399 kr. verðmun. Þá var kílóverðið af frosnu lambalæri 120% hærra í Hagkaup þar sem það kostaði 2.199 kr. en í Bónus þar sem það var á 998 kr,“ segir í könnun ASÍ.

Bónus reyndist með lægsta verðið í 69 af 117 tilfellum, verslun Iceland reyndist með það hæsta í 48 tilfellum. Í könnuninni var hilluverð á 117 vörum skráð niður en það er það verð sem neytandinn hefur upplýsingar um þegar hann ákveður hvort hann ætli að kaupa viðkomandi vöru. Ef að afsláttur er tekinn fram á hillu er hann tekinn til greina.

Könnunin var framkvæmd á sama tíma í öllum verslunum en þær eru: Bónus Smáratorgi, Krónan Granda, Nettó Granda, Super 1 Faxafeni, Fjarðarkaup, Hagkaup Skeifan, Iceland Engihjalla og Costco.