Skutlari í vímu velti bifreið

Ökumaður sem velti bifreið sinni á Sandgerðisvegi fyrir skömmu kvaðst vera skutlari. Ökumaðurinn, sem er kona, var grunuð um fíkniefnaakstur og renndu sýnatökur stoðum undir það. Hún var flutt á Heilbrigðisstofnun Suðurnesja til aðhlynningar, að því er fram kemur í tilkynningu frá Lögreglustjóranum á Suðurnesjum.

Annar ökumaður sem hafði ekið bifreið sinni út í skurð var meðvitundarlaus af áfengisneyslu þegar lögregla kom á vettvang. Viðkomandi viðurkenndi áfengisneyslu þegar hann komst til meðvitundar.

Þriðji ökumaðurinn, grunaður um akstur undir áhrifum áfengis, var sofandi í bifreið sinni, sem var í gangi, þegar lögreglu bar að.