Enn einu skipinu sökkt á Svarta­hafi

Nicusor Dan, forseti Rúmeníu, sakaði í morgun Rússa um að bera ábyrgð á því að skipið hefði sokkið. Hann sagði Rússa vera að fjölga árásum sínum á svæðinu og um væri að ræða hluta af stigmögnun Rússa vegna innrásarinnar í Úkraínu.

Rússar hafa verið sakaðir um fjölda árása og ógnana innan Evrópu á undanförnum mánuðum.

Tíu Úkraínumenn og þrír Aserar eru í áhöfn skipsins en verið var að sigla því frá Tyrklandi til Sulina í Rúmeníu. Skipið, sem heitir Khoryv og er skráð í Comoros, var statt rúma tuttugu kílómetra austur af Costanta þegar því hvolfdi.

Myndefni sem hefur verið í dreifingu á samfélagsmiðlum sýnir það mara í hálfu kafi í morgun. Veður hefur gert björgunarstörf erfið.

Rússar hafa gert árásir á þó nokkur flutningaskip á svæðinu, innan efnahagslögsögu Rúmenía og Búlgaríu, NATO-ríkja, á undanförnum dögum. Samkvæmt AP-fréttaveitunni eru árásirnar orðnar að minnsta kosti sjö í þessum mánuði. Þetta yrði þá áttunda árásin.

Að minnsta kosti tveir eru látnir og 25 er saknað eftir þessar drónaárásir.

Fréttin hefur verið uppfærð með ummælum forseta Rúmeníu.