Fór fram úr Verstappen og svo fram úr sér

Miklar rigningar blöstu við mönnum á brautinni í Singapúr í morgun og fresta þurfti sprettkeppninni um rúman hálftíma sökum þess.

Afskaplega blaut braut hafði áhrif á keppnina þegar hún loks komst af stað og varð spretturinn nær því að vera skokk til að byrja með.

George Russell spratt aftur á móti úr spori og fór fram úr Max Verstappen í fyrstu beygju og tók forystuna.

Hann fór ekki aðeins fram úr Verstappen heldur einnig fram úr sér þar sem hann missti stjórn á bílnum í bleytunni og þeyttist utan í vegg. Eftir erfiða viku gengur allt áfram á afturfótunum hjá Bretanum sem missti af sínum eina möguleika á stigum um helgina.

Russell mætir nefnilega til leiks í kappakstur morgundagsins með nýja vél og því ræsir hann aftastur þar.

Vegna áreksturs Russells frestaðist keppnin enn frekar og ýmsir ökuþórar lentu í vandræðum í bleytunni. Heilir sex voru fallnir úr leik þegar keppni var ræst að nýju.

Verstappen leiddi til loka og kom fyrstur í mark. Lewis Hamilton á Ferrari var annar og liðsfélagi hans Charles Leclerc þriðji.

Þegar menn voru að rúlla lokahringinn tókst Lando Norris hins vegar að klessa á liðsfélagann Oscar Piastri með þeim afleiðingum að sá síðarnefndi féll úr keppni.

Líkt og áður segir er kappaksturinn í Singapúr á morgun og tímataka fyrir hann fer fram síðar í dag. Bein útsending frá tímatökunni hefst klukkan 12:55 á Sýn Sport Viaplay.