Allir mennirnir breskir ríkis­borgarar

Í yfirlýsingu frá hryðjuverkalögreglu Bretlands segir að rannsókn málsins sé gífurlega umfangsmikil. Þá kemur fram að hvað mönnunum gekk til liggi ekki enn fyrir. Áður hefur komið í ljóst að verið sé að skoða hvort þeir tengist yfirvöldum í Íran með einhverjum hætti.

Eftir að þeir voru handteknir gaf lögreglan út að þeir væru grunaðir um brot á lögum um sprengiefni en seinna meir var bætt við grun um skipulagningu hryðjuverks.

Þeir voru handteknir nærri breskri herstöð sem hýsir einnig bandarískar sprengjuflugvélar sem notaðar hafa verið til árása í Íran á undanförnum mánuðum. Mennirnir voru á þremur sendiferðabílum og var róbóti notaður til að skoða inn í bílana á sunnudaginn.

Sjá einnig: Rannsaka möguleg tengsl Íran við meinta hryðjuverkamenn

Vegna hættunnar var stór hluti bæjarins Whelford rýmdur en til stendur að skoða seinna í dag hvort hleypa eigi fólkinu aftur til síns heima.

Segist hafa séð allt að tíu menn

Mennirnir voru handteknir eftir að tilkynning barst frá bónda á svæðinu um grunsamlega menn á ferðinni á sendiferðabílum. Þá hafði bóndinn séð mennina í lambhúshettum við bílana og reyndu einhverjir þeirra að fela sig þegar hún ók fram hjá þeim.

BBC hefur eftir konunni að hún sé handviss um að hún hafi séð fleiri en fimm menn. Þeir hafi ekki verið færri en átta og allt að tíu. Einhverjir þeirra hafi hlaupið út í skóg þegar þeir sáu hana.

Sjá einnig: Fimm hand­teknir og grunaðir um skipu­lagningu hryðjuverks

Hún segist hafa áhyggjur af því að þessir menn séu enn á vappi um svæðið og var undrandi á því að enginn hafi sett sig í samband við hana til að ræða betur við hana um hvað hún sá þarna um nóttina.

Í frétt Guardian segir að Wes Streeting, varnarmálaráðherra, hafi sagt að umrædd kona hafi ekki yfirsýn yfir málið, eftir að hún gagnrýndi yfirvöld vegna mannanna.

Hún svaraði ráðherranum í morgun og sagði að það eina sem hún vissi væri að hún hefði séð þrjá grunsamlega sendiferðabíla í miðju þorpi þeirra og hóp óþekktra manna á hlaupum.

„Ég veit ekki hvernig hann veit hvaða ásýnd ég er með, ég hef aldrei hitt hann.“

Hún var einnig spurð út í ummæli Donalds Trump, Bandaríkjaforseta, um að mennirnir hefðu verið undir eftirliti yfirvalda.

„Það er frábært en kannski hefðu þeir þurft að fylgjast aðeins betur með þeim,“ sagði bóndinn.

Enn sem komið er hefur enginn nema Trump sagt að mennirnir hafi verið undir eftirliti. Það þykir skrítið að mönnunum hafi verið leyft að keyra þremur sendiferðabílum með sprengjum innanborðs inn í þorpið nærri herstöðinni, ef fylgst var með ferðum þeirra.

Íbúar hafa þó sagt frá því að fyrir handtökurnar á sunnudaginn hafi lögregluþjónar verið á ferðinni í þorpinu.