Þriggja turna þras í fursta­dæmunum

Í viðtali við úkraínskan miðil í morgun sagði Selenskí að hann hefði fengið þau skilaboð frá ríkisstjórn Donalds Trump í Bandaríkjunum að þar væri vonast til þess að hægt væri að halda þennan þriggja hliða fund í furstadæmunum. Bandaríkjamenn buðust til að skipuleggja viðræðurnar en ekki er um að ræða leiðtogafund, heldur fund milli erindreka ríkjanna þriggja.

Selenskí sagði að von væri á formlegu boði frá Bandaríkjamönnum og frekari upplýsingar, eins og það hvenær fundurinn ætti að fara fram, lægju ekki fyrir.

Hann sagðist þó tilbúinn til að taka þátt í fundinum og hitta Pútín í þeirri von að hægt væri að binda enda á stríðið. Forsetinn lýsti hins vegar yfir miklum efasemdum um að Pútín hefði raunverulegan áhuga á að setjast við samningaborðið.

Í samtali við rússneska fjölmiðla í morgun sagði Dmitrí Peskóv, talsmaður Pútíns, að þriggja hliða fundur hefði verið meðal þess sem Pútín hefði rætt við Trump í síma fyrr í mánuðinum. Hann vildi ekki ræða frekar hvað forsetarnir hefðu talað um en sagði að fundurinn gæti mögulega farið fram í náinni framtíð.

Þá sagði Peskóv að frekari viðræður við Bandaríkjamenn væru yfirstandandi.

Hafa lítið áorkað í friðarmálum

Þegar þeir Jared Kushner og Steve Witkoff, tengdasonur Trumps og vinur hans, fóru á fund Pútíns fyrr í mánuðinum var Pútín fullur sjálfstrausts og lýsti því yfir að innan nokkurra mánaða myndu hermenn hans hertaka allt Donbas-svæðið og að Rússar væru tilbúnir til að jafna orkukerfi Úkraínu við jörðu fyrir veturinn.

Kushner mun þá hafa bent Pútín á að hann hefði sagt það nákvæmlega sama á fundi þeirra fyrir um ári. Þá spurði Kushner hverjar líkurnar væru á því að þeir myndu heyra það sama eftir annað ár og sagði að best væri að sleppa því bara og koma á friði sem fyrst.

Sjá einnig: Veturinn verði Rússum erfiður

Áður en hann varð forseti á nýjan leik hét Trump því að binda enda á stríðið á sínum fyrsta degi í embætti eða jafnvel fyrr. Þeir Kushner og Witkoff hafa verið hans helstu tól í þessari viðleitni, eftir að hann gat ekki sjálfur sannfært Pútín um að binda enda á stríðið, en þeim hefur lítið sem ekkert gengið.

Þá hafa Bandaríkjamenn reynt að fá Úkraínumenn til að verða við núverandi kröfum Rússa og gefa eftir restina af Donbas-svæðinu, sem myndað er af Dónetsk- og Lúhanskhéruðum. Rússar stjórna svo gott sem öllu Lúhansk en Úkraínumenn stjórna enn stórum hluta Dónetsk en það svæði er gjarnan kallað „virkisbelti“ Úkraínu.

Rússar hafa lagt gífurlega mikla áherslu á að hernema þetta svæði en það hefur gengið mjög hægt og er talið hafa kostað þá mjög í mönnum og hergögnum á undanförnum árum.

Nýverið bárust fregnir af því að Bandaríkjamenn væru að íhuga að gera þær breytingar að bjóða Rússum umfangsmikla viðskiptasamninga áður en friði hefur verið komið á. Það á að vera til að sýna að þeim sé alvara með að bæta samskipti Bandaríkjanna og Rússlands.

Úkraínumenn og aðrir bandamenn þeirra hafa hins vegar lengi kallað eftir því að Bandaríkjamenn auki efnahagslegan þrýsting á Rússa. Trump hefur ítrekað sagt að hann ætli að gera slíkt en hefur aldrei staðið við þau stóru orð.