Gerðu tvö­falda á­rás á verslunar­mið­stöð fjarri víg­línunni

Eldur kviknaði vegna árásarinnar og eru skemmdirnar á verslunarmiðstöðinni miklar.

Notast var við þotuknúna sjálfsprengidróna, samkvæmt myndböndum af vettvangi. Árásin var gerð um klukkan 16:30 að staðartíma og í tveimur bylgjum. Seinni bylgjan er sögð hafa verið gerð um hálftíma eftir að fyrsti dróninn, eða drónarnir, skullu á verslunarmiðstöðinni.

Á ensku eru árásir sem þessar kallaðar „Double-Tap“ árásir og eru þær iðulega gerðar af hryðjuverkamönnum víðsvegar um heiminn og er þeim ætlað að valda miklu mannfalli meðal viðbragðsaðila sem bregðast við fyrstu árásinni. Rússar voru á árum áður ítrekað sakaðir um árásir sem þessar í Sýrlandi en þeir hafa einnig gert fjölmargar í Úkraínu.

Sjá einnig: „Veiddu“ grænmetissala með dróna

Vólódímír Selenskí, forseti Úkraínu, segir árásina vera viðurstyggilega. Þetta sé ekkert nema hryðjuverkaárás og alþjóðasamfélagið þurfi að bregðast við.

Kryvyi Rih er í Dnipropetrovsk-héraði í suðurhluta Úkraínu en er tiltölulega langt frá víglínunni.