Fyrirsætuveiðari Epsteins fannst látinn

Siad var einn nokkurra franskra manna sem unnu við það að finna fyrirsætur og hafa verið sakaðir um að hjálpa Epstein við að misnota ungar konur.

Jean-Luc Brunel var annar slíkur maður en hann var handtekinn fyrir nauðgun árið 2020 og fannst látinn í fangaklefa sínum árið 2022. Sjálfur dó Epstein í fangelsi árið 2019.

Sjá einnig: „Besti vinur“ Epsteins ætlaði að leysa frá skjóðunni 2016

Siad hafði meðal annars verið sakaður um nauðgun og var til rannsóknar hjá löggæsluembætti sem sérhæfir sig í að rannsaka mansal.

Hann sagðist aldrei hafa brotið af sér og hafði sagst vilja ræða við lögregluþjóna um ásakanirnar.

Sú umræða fór þó aldrei fram, samkvæmt frétt France24.

Nafn Siads birtist gífurlega oft í hinum svokölluðu Epstein-skjölum. Þar kemur meðal annars fram að Epstein greiddi Siad tugi þúsunda dala gegnum árin fyrir það að leita að ungum konum, sem Frakkinn líkti við fiskveiði.

Í einu skjali, sem snýr að samskiptum Siads og Epsteins á Skype, sést að Epstein bað Frakkann um að taka mynd af einhverri konu og vegabréfi hennar.

„Hún er mjög sæt,“ segir Epstein á einum tímapunkti. Eftir að hann biður um frekari myndir og fær þær segir hann svo: „Hún virðist ekki glöð“ og „Eru þetta gervibrjóst?“

Siad svaraði og sagði að hún væri mjög ljúf og kurteis og að hún hefði farið í brjóstaaðgerð.

Í öðrum skilaboðum þeirra á milli sendi Siad Epstein mynd af konu sem hann sagði einnig „kurteisa“ og að hún gæti verið aðstoðarkona auðjöfursins eða fyrirsæta.

Epstein svaraði:

„Of gömul.“

Samkvæmt CNN sendi Siad Epstein myndir af fjölda kvenna í gegnum árin.

Sneri sér að Austur-Evrópu eftir fangelsisvist

Epstein hafði fyrst verið handtekinn árið 2006. Hann var þá sakaður um að hafa brotið á fjölda stúlkna og ungra kvenna yfir nokkurra ára tímabil. Til stóð að ákæra hann í 32 liðum og þá meðal annars fyrir að hóta sextán ára stúlku.

Sjá einnig: Sextán ára fékk greitt fyrir að færa Epstein stúlkur

Eftir handtökuna og afplánunina einbeitti Epstein sér að því að flytja ungar konur frá Evrópu og aðallega Rússlandi til Bandaríkjanna, á þeim grunni að þær væru fyrirsætur. Á þessum konum braut hann í skjóli þess að þær voru háðar honum upp á bæði peninga og landvistarleyfi í Bandaríkjunum.

Þá þrýsti hann einnig á þær og fékk til að segja sér frá samneyti þeirra með öðrum mönnum.

Grunur leikur á að eftir að hann var upprunalega fangelsaður 2008 hafi menn eins og Siad aðstoðað hann við að finna þessar konur.