„Antonio hefur með eigin augum séð byggingar hrynja“

Páll Óskar lýsir því hvernig þeim bárust fréttirnar.

„Fyrstu klukkutímarnir voru hryllilegastir. Hann reynir strax að hafa samband við fólkið sitt en enginn svarar – það er ekkert símasamband, ekkert internet. Að vita ekkert um afdrif fjölskyldunnar er hryllilegt. Þú getur rétt ímyndað þér hvers lags martröð það er.“

Sem betur fer hafi fjölskylda Antonios þó verið heil á húfi. Það eigi þó alls ekki við um alla.

„Sem betur fer eru allir á lífi og hús þeirra flestra standa enn, þó innanstokksmunir og slíkt hafi brotnað. Sömu sögu er ekki að segja um vini og fólk sem þau þekkja. Antonio þekkir fólk sem jafnvel hefur ekkert spurst til frá því þetta gerðist.“

Jarðskjálftinn rifjar einnig upp slæmar minningar fyrir Antonio sem var staddur í Ekvador þegar jarðskjálfti upp á 7,8 reið yfir árið 2016.

„Antonio hefur séð með eigin augum byggingar hrynja fyrir framan nefið á sér.“

Aðstæður í Venesúela voru mjög bágbornar fyrir skjálftann, innviðir víða að hruni komnir og efnahagsástand slæmt.

„Það eru í raun tvær hörmungarsögur í gangi, önnur af náttúruvöldum og hin af mannavöldum. Ég get staðfest það að hörmungaratburðarásin af mannavöldum er verri. Ég veit ekki hvort fólki sé kunnugt um hvernig ástatt hefur verið í Venesúela síðustu tuttugu og fimm árin. Venesúela frá því að vera ríkasta þjóð Suður-Ameríku yfir í algjört gjaldþrot.“

Páll vísar hér til valdatíðar Hugo Chavez, forseta landsins frá árinu 1999 til dánardags 2013, og Nicolas Maduro, arftaka hans sem tók við af Chavez og gegndi embætti uns Bandaríkjastjórn handtók hann og færði í hald í Bandaríkjunum í upphafi þessa árs.

„Þeir lofa fólki bót og betrun undir einhverju yfirskini sósíalisma sem þróast síðan út í fasisma, spillingu og glæpatíðni eykst – allt í einu fá glæpahópar að leika lausum hala með einhverju samþykki stjórnvalda.“

Páll Óskar segir ólíft fyrir almenning í Venesúela. Þá sitji enn sami hópur fólks við völd þó að Maduro hafi verið fjarlægður. Einhverjir íbúar landsins hafi ef til vill borið vonarglætu í brjósti eftir að varaforseti landsins, Delcí Rodriguez, tók við stjórnartaumunum en fljótt hafi verið slökkt í þeirri glætu. Páll segir að í þeim hópi Venesúelabúa sem sé í kringum sig hafi von um stórfelldar breytingar ekki verið til staðar.

„Flestir ypptu öxlum og áttu ekki von á að nokkuð myndu breytast.“

Almenningur drýgi hetjudáð

Myndskeið sem sýna almenna borgara sinna björgunarstörfum hafa vakið athygli og sýna vel getuleysi stjórnvalda.

„Það eru almennir borgarar í Venesúela að reyna að lyfta steinsteyptum veggjum af fólki vegna þess að það berst engin hjálp. Meira að segja fyrir jarðskjálftann, segjum að þú lendir í alvarlegu umferðarslysi, það er ekkert víst að það berist sjúkrabíll á staðinn.“

UNICEF stendur fyrir söfnun

Páll Óskar hvetur landsmenn til að styrkja Barnahjálp Sameinuðu þjóðanna, UNICEF, sem stendur nú fyrir söfnun vegna hamfaranna. Með því að hringja í síma 907-3016 sé hægt að styrkja UNICEF um þrjú þúsund krónur.

„Þetta er það minnsta sem við getum gert hér heima ef við viljum sýna þessu fólki einhverja lágmarkssamkennd.“