Starmer segir af sér

Starmer tilkynnti um afsögnina fyrir utan bústað forsætisráðherrans í Downing-stræti í London á níunda tímanum í morgun. Hann sagðist hafa tilkynnt Karli III Bretakonungi um ákvörðun sína í morgun. 

Starmer sagði ljóst að hann nyti ekki lengur nægilegs stuðnings meðal flokksmanna til að gegna stöðunni áfram, en rúmlega hundrað þingmenn Verkamannaflokksins höfðu skorað á hann að láta af embætti. 

Starmer varði helginni í sumarbústað forsætisráðherrans og lagði mat á stöðuna og fóru breskir fjölmiðlar að flytja fréttir á sunnudaginn um að Starmer hefði tekið ákvörðun um afsögn.

Starmer hefur gegnt embætti forsætisráðherra Bretlands frá júlí 2024 eftir stórsigur Verkamannaflokksins í þingkosningum. Hann tók við forsætisráðherraembættinu af þáverandi leiðtoga Íhaldsflokksins, Rishi Sunak. Starmer tók við leiðtogaembættinu í breska Verkamannaflokknum af Jeremy Corbyn árið 2020.

Mikill þrýstingur hefur verið á Starmer að segja af sér og ekki dró úr honum þegar Andy Burnham fyrrverandi borgarstjóri Manchester vann þingsæti í aukakosningu á dögunum sem mun gera honum kleift að skora Starmer á hólm og sækjast eftir leiðtogasætinu og forsætisráðuneytinu.

Á fréttamannafundinum í morgun sagði Starmer að hann myndi nú einbeita sér að því að verða besti eiginmaðurinn fyrir eiginkonu sína og besti faðirinn fyrir börnin sín. Hann sagðist sömuleiðis munu styðja við bakið á hverjum þeim sem tekur við formennsku í Verkamannaflokknum.