Boðar harðar á­rásir og her­nám Kharg-eyju

Þetta segir Trump í færslu á samfélagsmiðli sínum. Hann lýsir árásum kvöldsins sem „mjög hörðum“.

Bandaríkjamenn og Íranir hafa skipst á árásu síðustu daga og virðist sem vopnahléið sem samið var um í síðasta mánuði sé ekki lengur í gildi.

Um yfirtöku á olíu- og jarðgasframleiðslu í Íran segir Trump að þetta verði líkt því sem ríkisstjórn hans gerði í Venesúela og heldur því fram að það sé að reynast gífurlega vel, bæði fyrir Venesúla og Bandaríkin.

Kharg-eyja er Írönum gífurlega mikilvæg þegar kemur að olíu- og gasframleiðslu. Þar er stórum hluta olíu og jarðgasi sem dælt er úr jörðu í Íran dælt á flutningaskip. Flutningsgetan þaðan er um sjö milljónir tunna af olíu á dag.

Sendi hermenn sem gætu tekið eyjuna

Í mars lýstu Bandaríkjamenn því yfir að til stæði að senda um þrjú þúsund fallhlífarhermenn til Mið-Austurlanda og að hlutverk þeirra yrði að styðja við aðgerðir gegn Íran. Landgönguliðar hafa einnig verið sendir á svæðið.

Umræddir fallhlífarhermenn tilheyra stórfylki (Brigade) úr 82. herdeild (Division) fallhlífarhermanna. Þetta stórfylki hefur verið þjálfað og búið þannig að hægt eigi að vera að senda meðlimi þess hvert sem er í heiminum með 18 klukkustunda fyrirvara.

Hermennirnir eru sérstaklega þjálfaðir til að stökkva úr flugvélum og taka mikilvæga innviði eins og flugvelli.

Sjá einnig: Sendir líka fallhlífarhermenn til Mið-Austurlanda

Þá var umfangsmikil umræða um að hermennirnir gætu verið notaðir til að hernema Kharg-eyju en Bandaríkjamenn höfðu þá gert loftárásir á eyjuna. Meðal annars voru árásir gerðar á flugvöllinn þar, sem gæti gert Írönum erfiðara um vik með að senda liðsauka.

Vildi taka eyjuna frá upphafi

Hernám Kharg-eyju fæli í sér mikla hættu fyrir bandaríska hermenn. Íranir hafa byggt upp varnir þar í gegnum árin og eru einnig taldir hafa komið fyrir gildrum og jarðsprengjum víða. Þá hafi þeir flutt talsvert magn af flugskeytum gegn flugvélum sem einn hermaður getur skotið, vopn sem kallast MANPADS, til eyjunnar.

Þegar umræðan um eyjuna var hvað háværust í mars sögðu sérfræðingar í samtali við CNN að margir hermenn gætu fallið.

Heimildarmenn miðilsins í varnarmálaráðuneytinu og ríkisstjórn Bandaríkjanna segja nú að hingað til hafi forsvarsmenn heraflans talið hernám Kharg of hættulegt. Það myndi þó gera klerkastjórninni mun erfiðara að halda velli án tekna þaðan.

Í samtali við Fox News í dag sagðist Trump frá upphafi átakanna gegn Íran hafa viljað hernema Kharg-eyju. Bandaríkjamenn gætu grætt fúlgur fjár á því eins og þeir hafa gert í Venesúela. Hann sagðist þó ekki viss um að bandaríska þjóðin studdi það.

„Ég er ekki viss um að þjóðini hafi lyst á því, ef það meikar sens, sama hversu gott þetta er.“

Trump hélt því einnig fram að íranski herinn væri alfarið búinn á því og að ef hann vildi, gæti hann hernumið all landið með tiltölulega fáum hermönnum.

Þá skammaðist hann út í fjölmiðla fyrir að vilja ekki segja frá því.

Skutu eldflaugum á flutningaskip

Bandarískir hermenn skutu í gærkvöldi á olíuskip á Ómanflóa. Þeir segja að skipið, sem hafi verið siglt undir fána Gíneu-Bissaú, hafi verið notað til að flytja olíu frá Íran og reynt hafi verið að sigla því gegnum herkví Bandaríkjamanna um Íran.

Síðan Íranir lokuðu Hormússundi fyrir svo gott sem öllum skipaflutningum hafa Bandaríkjamenn haldið Íran í herkví og meinað klerkastjórninni að flytja olíu úr landi.

Í yfirlýsingu frá miðstjórn herafla Bandaríkjanna í Mið-Austurlöndum (CENTCOM) segir að þetta sé þriðja skipið sem Bandaríkjamenn gera óvirkt með árásum á undanfarinni viku.

Að þessu sinni var tveimur eldflaugum af gerðinni Hellfire skotið inn í vélarrými skipsins eftir að áhöfn þess neitaði að hlýða ítrekuðum skipunum Bandaríkjamanna, samkvæmt CENTCOM.

Áður höfðu Bandaríkjamenn í vikunni stöðvað eitt skip sem reynt var að sigla til hafnar í Íran og annað sem verið var að nota til að flytja olíu þaðan.

Í heildina segjast Bandaríkjamenn hafa stöðvað níu skip með valdi, snúið 135 skipum við og leyft 42 skipum sem fluttu almennar nauðsynjar að fara gegnum herkvína frá því henni var komið á þann 13. apríl.

Fréttin hefur verið uppfærð.