Hafa gert leyni­legar á­rásir í Íran

Frá því Bandaríkjamenn og Ísraelar hófu árásir á Íran í lok febrúar hafa Íranir gert ítrekaðar árásir á furstadæmin. Í mörgum tilfellum hafa þessar árásir beinst að borgaralegum innviðum og olíuvinnslu og hafa árásirnar verið tíðari en Íranir hafa gert á önnur ríki á svæðinu.

Ráðamenn ríkja við Persaflóa sögðu margir í upphafi að lofthelgar þeirra yrðu ekki notaðar til árása gegn Íran. Þegar árásirnar hófust gerði klerkastjórnin þó ítrekaðar árásir með skotflaugum og sjálfsprengidrónum á borgir og orkuinnviði nágranna sinna.

Markmiðið með þeim árásum var að gera stríðsreksturinn erfiðari fyrir Bandaríkin og Ísrael, bæði efnahagslega og pólitískt séð.

Íranir hafa skotið rúmlega 2.800 skotflaugum og drónum að Furstadæmunum. Ekkert ríki hefur orðið fyrir nærri því jafn umfangsmiklum árásum og er Ísrael þar á meðal.

Sjá einnig: Furstadæmin yfirgefa OPEC

Herafli furstadæmanna er vel vopnum búinn, þó hann sé tiltölulega fámennur, en umræddar árásir hafa, samkvæmt Wall Street Journal, meðal annars beinst að olíuvinnslu Írana á Lavan-eyju í Persaflóa. Sú árás var gerð snemma í apríl, skömmu áður en Donald Trump, forseti Bandaríkjanna, tilkynnti vopnahléið sem hangir nú á bláþræði.

Sjá einnig: Vopnahléið í öndunarvél eftir „rusl“ svar klerkastjórnarinnar

Þá svaraði klerkastjórnin fyrir sig með árásum á bæði furstadæmin og Kúveit en aldrei var varpað ljósi á hverjir hefðu framkvæmt árásina.

Samkvæmt WSJ voru Bandaríkjamenn ekki ósáttir við árásina og tóku þeir þátttöku furstadæmanna fagnandi og í einrúmi voru ráðamenn annarra ríkja við Persaflóa hvattir til að taka einnig þátt í árásunum gegn Íran.

Um miðjan mars voru myndir teknar af herþotu yfir Íran sem sérfræðingar töldu hvorki tilheyra Bandaríkjunum né Ísrael og hafa síðan þá verið miklar umræður um þátttöku Furstadæmanna í árásum á Íran.

Myndir hafa einnig náðst af frönskum Mirage-herþotum yfir Íran og kínverskum Wing Loong-drónum en það eru hergögn sem Furstadæmin nota.

Í mars sögðu ísraelskir miðlar frá því að Furstadæmin hefðu gert árás á vatnseymingarstöð í Íran. Þá urðu ráðamenn í Dubai reiðir yfir því sem þeir kölluðu falsfréttir. Formaður þjóðaröryggisráðs Furstadæmanna skrifaði á samfélagsmiðla að fregnirnar væru rangar.

Þegar við gerum eitthvað, höfum við hugrekki til að opinbera það, sagði Rashid Al Nuaimi.

Beita sér gegn klerkastjórninni á öðrum sviðum

Auk þess að gera árásir á Íran hafa furstadæmin beitt sér gegn Íran innan Sameinuðu þjóðanna, gripið til efnahagslegra aðgerða gegn klerkastjórninni, lokað skólum og klúbbum í Dúbaí sem tengjast klerkastjórninni og neitað Írönum um vegabréfsáritanir, svo eitthvað sé nefnt.

WSJ segir þetta hafa komið nokkuð niður á klerkastjórninni, þar sem Furstadæmin hafi lengi verið eins konar lífilína fyrir Írani til að komast hjá viðskiptaþvingunum og refsiaðgerðum.

Við þessu hefur klerkastjórnin brugðist við með því að saka furstadæmin um að ganga til liðs við Bandaríkin og Ísrael gegn Íran.

Sendiherra Bandaríkjanna í Ísrael sagði í morgun að Ísraelar hefðu sent loftvarnarkerfi og hermenn til að stýra þeim til furstadæmanna. Þar eiga þeir að hjálpa við varnir landsins gegn árásum frá Íran.