„Ein­hver verður að gera eitt­hvað til að stoppa manninn af“

„Þetta er svo hernaðarlega mikilvægt. Núna er allt morandi í rússneskum og kínverskum skipum í kringum Grænland. Við þurfum á Grænlandi að halda frá sjónarhóli þjóðaröryggis og Danmörk mun ekki geta séð um það, það get ég sagt þér.“

Þetta sagði Donald Trump Bandaríkjaforseti í gærkvöldi en hernaðaríhlutun Bandaríkjamanna í Venesúela hefur sett ásælni Trumps í nýtt og óhugnanlegra samhengi. Í gær sendi formaður landsstjórnar Grænlands frá sér harðorða yfirlýsingu og sagði nóg komið. Fréttastofa ræddi í kvöldfréttum Sýnar við Ingu Dóru Guðmundsdóttur Markussen, fyrrverandi fjölmiðla- og stjórnmálakonu um áhrif vendinganna á grænlensku þjóðina.

„Þessi innrás í Venesúela opnar þessi gömlu sár svo að segja, opnar þessa umræðu aftur og hversu langt erum við komin í þessari stöðu? Það er þessi tilfinning. Hvernig er hægt að stoppa þetta af? Alþjóðasamfélagið er komið fram með sínar yfirlýsingar til Danmerkur og Grænlands og það er byrjað, en það var ekki sama í fyrra, þá vorum við mjög alein í heiminum.“

Hún rifjar upp óttann og álagið sem margir landar hennar upplifðu fyrir ári þegar Trump yngri og Charlie Kirk heitinn lentu á Grænlandi eftir að Bandaríkjaforseti hafði látið í ljós vilja til að taka yfir Grænland.

„Þá var þetta miklu meiri óöryggistilfinning og hræðsla í fólkinu en í dag er meiri reiði og valdefling; einhver verður að gera eitthvað til að stoppa manninn af.“

Inga Dóra kveðst vera raunsæismanneskja og vill fá skýrari svör um hvernig það liti út fyrir Grænlendinga ef hið ótrúlega gerðist; að Bandaríkin tækju yfir Grænland. Henni finnst eins og verið sé að halda aftur af fólki að eiga umræðu um þá sviðsmynd.

„Til að ekki komi upp „panick“ stemning en það þarf virkilega að tala opið um stöðuna og það finnst mér vanta eins og er því þetta gæti orðið að veruleika.“

Inga Dóra segir stöðuna flókna.

„Það er eins og við séum peð í stóru spili. Fólki hefur áður fundist Trump bara vera með orðræðu og talið að ekkert væri á bak við orðin en nú er tilfinningin öðruvísi, það er þessi tilfinning að þetta gæti alveg skeð. Það gæti alveg skeð að Bandaríkin sjái um sína hagsmuni og vilji Grænland inn undir Bandaríkin.“ 

Hún kallar eftir því að fjölmiðlar rýni í þá sviðsmynd að Bandaríkin taki yfir Grænland.

„Hvernig það myndi líta út? Því við verðum að vera viðbúin ef það skildi gerast. Því þetta er svo ótrúlegt mál.“

„Hvað viltu með Grænland? hvað er hér sem er svona áhugavert? Það eru náttúrulega auðlindir, alveg eins og er í Venesúela og það hefur mikið að segja fyrir okkur hvort þetta eru rökin fyrir því að taka Grænland yfir, hvaða afleiðingar hefði það og hver gæti varið Grænland gagnvart þessu? Þetta er rosalega alvarlegt mál.“

Hún hvetur bandamenn Grænlands til að sýna samstöðu.

„Það er bandarískur konsúll hér sem er að skila skilaboðum í Hvíta húsið þannig að það má alveg sýna samstöðu og vera að ybba gogg svolítið fyrir stöðu Grænlands í þessu máli. Þetta er hvatning til Íslendinga og almennt til fólks um að sýna stuðning sinn.“