Tugir drepnir á meðan þau biðu eftir matarskammti

Særð og látin voru flutt á Nasser spítalann sem hefur staðfest 51 andlát en samtökin Læknar án landamæra segja þau 59 og að 200 til viðbótar hafi særst á meðan þau biðu eftir því að fá skammt af hveiti í Khan Younis

Fjallað er um þetta á vef AP. Þar er haft eftir vitni að árásinni að Ísraelar hafi hafið loftárás á heimili í Khan Younis og svo skotárásir í átt að mannfjöldanum. Í frétt AP segir enn fremur að Ísraelsher segir hermann hafa tekið eftir því að fólk væri að safnast saman við bíl með hjálpargögnum sem hafi verið fastur í Khan Younis. Þeir segja nokkra hafa dáið og að stjórnvöld muni rannsaka atvikið.

Mannúðaraðstoð Sameinuðu þjóðanna, OCHA, segir fólkið hafa verið að bíða eftir matarskammt frá Sameinuðu þjóðunum.

Í frétt AP segir einnig að loftárásir Ísraela á Ramallah á Vesturbakkanum hafi leitt til þess að ekkert síma- eða internetsamband var á Gasa.

Skotið á fólk að sækja sér aðstoð

Palestínumenn hafa ítrekað greint frá því síðustu vikur að Ísraelar hafi skotið á hópa fólks sem bíður þess að fá afhentan mat við dreifingarmiðstöðvar sem eru reknar af Bandaríkjamönnum og Ísraelum og opnuðu í síðasta mánuði. Ísraelar hafa viðurkennt að hafa skotið viðvörunarskotum að fólki sem þeim þykir hafa nálgast stöðvarnar með grunsamlegum hætti.

Tilgangur stöðvanna er samkvæmt Ísrael að koma í veg fyrir að Hamas taki af neyðaraðstoðinni. Sameinuðu þjóðirnar og aðrar hjálparstofnanir hafa þvertekið fyrir að hjálpargögnum sé dreift til aðila sem ekki eigi að fá hana og hafa hafnað þessu nýja kerfi. Þau segja að ekki sé hægt að mæta þörfum fólksins á Gasa með því og að það sé mannréttindabrot að Ísraelar stjórni því hverjir fái aðstoð. Sérfræðingar hafa ítrekað varað við því að hungursneyð sé yfirvofandi á svæðinu en um tvær milljónir Palesínubúa búa á Gasa.

Sameinuðu þjóðirnar hafa átt í vandræðum með að koma hjálpargögnum inn á Gasa frá mars þegar Ísrael lokaði á það. Í maí var svo opnað aftur með skilyrðum um að hjálpargögnin færu í gegnum stöðvarnar sem þeir reka með Bandaríkjunum.

55 þúsund drepin á Gasa

Frá október 2023 hefur ísraelski herinn drepið rúmlega 55 þúsund Palestínubúa, meira en helmingur þeirra eru konur og börn samkvæmt heilbrigðisráðuneytinu á Gasa. Ekki er gerður greinarmunur í þessum tölum á almennum borgurum og stríðsmanni.

Ísraelar hófu áráris sínar í október í kjölfar þess að Hamas drap um 1.200 Ísraela, mestmegnis almenna borgara, og tóku 251 gísl. Enn eru 53 þeirra í haldi Hamas, flestir látnir.