Líkir viður­kenningu á Palestínu við „sigur fyrir hryðju­verk“

Emmanuel Macron, forseti Frakklands, sagðist í síðustu viku ætla að viðurkenna Palestínu sem sjálfstætt ríki á næstu mánuðum. Hann teldi það sanngjarna niðurstöðu.

Þau áform fara þvert ofan í ísraelsk stjórnvöld sem hafa háð stríð gegn Hamas-samtökunum á Gasa frá því að þau gerðu hryðjuverkaárás á Ísrael í október árið 2023. Tugir þúsunda Palestínumanna hafa verið drepnir í stríðinu.

Þeir Benjamín Netanjahú, forsætisráðherra Ísraels, og Macron ræddu saman í síma í dag. Í yfirlýsingu frá skrifstofu Netanjahú kom fram að hann hefði lýst harðri andstöðu við að Frakkland viðurkenndi palestínskt ríki.

„Palestínskt ríki aðeins nokkrum mínútum frá ísraelskum borgum yrði höfuðvígi hryðjuverka Írans,“ sagði í yfirlýsingunni en klerkastjórnin í Teheran er bakhjarl Hamas-samtakanna sem ráða Gasa.

Sjálfstætt ríki fyrir Palestínumenn hefur lengi verið á meðal forsenda fyrir friðarumleitunum fyrir botni Miðjarðarhafs. Íslensk stjórnvöld hafa viðurkennt Palestínu sem sjálfstætt ríki innan landamæra frá því fyrir sex daga stríðið árið 1967 frá árinu 2011.