Flosi fer í formanninn: „Ég lít ekki á mig sem full­trúa neinna fylkinga“

„Jájá, þetta var erfið ákvörðun. En nú eru náttúrlega ákveðin tímamót í félaginu og þá fannst mér gaman að bjóða mig fram. Sjá hvernig þetta þróast nú þegar formaður til margra ára er farinn til annarra starfa. VR er öflugt félag sem getur gert marga öfluga hluti,“ segir Flosi í samtali við Vísi.

En eins og kunnugt er hvarf Ragnar Þór Ingólfsson af vettvangi sem formaður VR og er nú kominn á þing fyrir Flokk fólksins.

Flosi segir þetta heilmikla ákvörðun, að bjóða sig fram til forystu hjá svo öflugu félagi. Hann hafi verið í félaginu frá 2006 en ekki verið mjög virkur. „En þekking mín á verkalýðsstarfi svo sem hjá Starfsgreinasambandinu og fleira ætti að nýtast félaginu afar vel.“

Ekki fulltrúi neinna fylkinga

Flosi gerir ráð fyrir því að þetta verði erfið barátta. Nú þegar hafi nokkrir öflugir frambjóðendur stigið fram.

„Ég held að það sé gott fyrir félaga að geta valið á milli. Ég lít ekki á mig fulltrúa neinna fylkinga, heldur er ég í framboði fyrir alla félagsmenn og ég held að sameinað félag geti náð miklu meiri árangri.“

Flosi nefnir að VR hafi verið að gera athyglisverða hluti í húsnæðismálum, svo sem með uppbygginu Bjargs og Blævar auk þess sem í landinu séu okurvaxtakjör sem taka þurfi á.

„Svo eru það dagleg verkefni sem snúast um afkomu venjulegs fólks og ég vil sinna þeim verkefnum af kostgæfni.“

Að sögn Flosa verður þetta rúmlega mánaðar löng kosningabarátta og hann hlakkar til að hitta sem flesta almenna félaga og ræða við þá.

„Ég hef eiginlega alltaf haft mikinn áhuga á hag vinnandi fólks. Að við sem leggjum okkar af mörkum til samfélagsins með vinnuframlagi alla starfsævina, búum við öryggi, góð lífskjör og getum byggt börnunum okkar bjarta framtíð. Við getum með samstöðu og áræðni haft áhrif á samfélagið og hvernig gæðunum er skipt.“

Áfram VR!

Til að allt þetta geti gengið eftir þarf VR öfluga forystu.

„VR er geysilega sterkt félag sem sameinar fólk í fjölbreytum störfum og atvinnugreinum. Með afli sínu og samstöðu á félagið að vera leiðandi í að tryggja kjarabætur og réttindi með hagsmuni allra félagsmanna að leiðarljósi. VR á að hafa sterka rödd í samstarfi innan verkalýðshreyfingarinnar og veita stjórnvöldum þétt aðhald í efnahags- og velferðarmálum.“

Flosi segir að í félaginu þurfi að vera virkt samráð við félagsmenn og öflugt grasrótarstarf. Þannig er best tryggt að sjónarmið félagsmanna liggi til grundvallar í öllu starfi og áherslum félagsins og félagið vinni að sameiginlegu hagsmunum.

„Við þurfum að huga að félagsfólki VR og hagsmunum þeirra. Við erum fast að 40 þúsund sem skipum félagið og forysta félagsins á að endurspegla þennan fjölbreytta hóp og þau baráttumál sem skipta okkur öll máli. Áfram VR!“ segir Flosi og er þegar kominn í kosningaham.