Egill telur eitt og annað ó­ljóst við bílatilboð Ástþórs

Eins og lesendur vita varð uppi fótur og fit þegar fram kom að Halla Tómasdóttir, sem tekur við sem forseti Íslands á morgun, hefði ásamt spúsa sínum keypt Volvo rafbíl hjá Agli. Var tekin mynd af þeim verðandi forsetahjónum ásamt Agli við bílinn. 

Myndina birti Brimborg svo á Facebook-síðu sinni en varð að taka hana niður þegar Halla sagði að hún hefði ekki gefið leyfi fyrir því að mynd af henni yrði notuð í auglýsingaskyni. Framkvæmdastjóri Brimborgar sagði það rétt en forsetinn þyrfti að svara því til hvers hann hafi talið að myndin væri tekin?

Hvað með rafbílastyrk ríkisins?

Gerðar voru athugasemdir við afsláttarkjör sem Halla fékk. Og reyndar hefur verið tekist á um það hvort þessi bílakaup og umfjöllunin um þau varpi skugga á forsetakandídatinn. Í framhaldinu reið svo Ásþór Magnússon fram á sjónarsviðið og sagði þetta ekkert, hann biði upp á sambærilegan bíl á enn lægra verði. Vildi Ástþór meina að hann væri með, miðað við kjörin sem verðandi forseta byðist, með sama bíl með tvær milljónir króna í afslátt. Ekkert forsetabíla-hókuspókusprútt hér hjá mér, sagði Ástþór. Sem fór svo að tala um frið, við blaðamann Vísis.

Egill vill hins vegar meina að þarna fari nú eitt og annað á milli mála. Svo sem:

„Ekki kemur fram hjá Ástþóri, hvorki í frétt né auglýsingu, hvort hann hafi þegar dregið frá rafbílastyrk Orkusjóðs þegar hann tilgreinir verðið.“

Egill segir ekki um sömu tegund bíls að ræða

Egill segir hefðbundið hjá Brimborg, og reyndar öðrum bílaumboðum, að tilgreina bæði töluna sem greiða þarf til umboðs og svo lægri tölu að teknu tilliti til styrks en viðskiptavinur þarf að sækja um styrkinn sjálfur.

„Ég rakst á frétt á visir.is um tilboð sem fyrrum forsetaframbjóðandi býður á Volvo EX30 þar sem fullyrt er að um sama bíl sé að ræða og hjónin Halla Tómasdóttir og Björn Skúlason keyptu af Brimborg og að verðið sé 2 milljónum undir verði bílsins frá Brimborg. Þetta er rangt og ritstjórn visis hefur undir höndum þá bíltegund og útfærslu sem keypt var af Brimborg og þá aukahluti sem fylgdu,“ segir Egill.

Hann segir jafnframt að sú gerð sem Ástþór auglýsir sé ódýrasta Core gerð en Brimborg sé með Ultra. Þá sé bíllinn sem Ástþór býður með minni rafhlöðu en sú sem Brimborg býður.

„Og er ekki með þeim aukahlutum sem fylgdu bílnum frá Brimborg,“ segir Egill.

Fimm ára ábyrgð, viðhald og öll þjónusta innifalin

Hann bendir að auki á að ábyrgð bílsins er óljós.

„Vitnað er í verksmiðjuábyrgð og enginn ábyrgðartími tilgreindur. Hjá Brimborg er ábyrgð bílsins 5 ár (lögbundin 2 ár og 3 ár að auki eða að 100.00 km).“

Auk þess er innifalið í verði Brimborgar er öll þjónusta og allt viðhald í 3 ár en verð Brimborgar miði við skráðan bil kominn á götuna.“

Agli finnst ekki sanngjarnt að Ástþór hafi ekki verið spurður ítarlega út í Volvó-bílinn sem hann vill selja meðan Brimborg hafi þurft að svara slíkum spurningum.

Vísir hefur gert ítrekaðar tilraunir til að ná tali af Agli en án árangurs. Eins og fram hefur komið er Egill á hinum svokallaða Smiðjulista, það eru þeir sem Halla vill bjóða sérstaklega til athafnarinnar þegar hún tekur við embættinu.