Spyr hvers vegna seðla­banka­stjóra sé leyft að grafa undan lífs­kjörum lág­tekju­fólks

Sólveig Anna Jónsdóttir, formaður Eflingar segir útspil Seðlabankans í morgun vera lið í áframhaldandi og síharðnandi stéttastríði gegn þeim sem verst hafa það í samfélaginu. Könnun Vörðu um aðstæður Eflingarfólks sýni síversnandi aðstæður.

„Meira en 60% Eflingarfélaga eiga nokkuð til mjög erfitt með að ná endum saman og 20% Eflingarfólks metur fjárhagsstöðu sína mun verri en fyrir ári. 55% Eflingarkvenna geta ekki mætt óvæntum 80 þúsund króna útgjöldum án þess að stofna til skulda og hátt í 30% Eflingarkvenna geta ekki séð börnum sínum fyrir nauðsynlegum klæðnaði og við hljótum bara að spyrja okkur hvers vegna seðlabankastjóri kemst upp með það að grafa markvisst undan lífskjörum þessa fólks.“

Sólveg spyr hvers vegna ríkisstjórnin ráðist ekki í aðgerðir til að draga úr neyslu þeirra sem hafa miklar ráðstöfunartekjur. Bæði verðbólga og stýrivaxtahækkanir komi verst niður á tekjulágum.

„Það er augljóst öllum þeim sem fylgjast með þessu að hún er ekki að gera það sem hún á að vera að gera, að grípa til raunverulegra og markvissra aðgerða með því að hækka skatta á auðstéttina sem hér lifir eins og aðall fyrri alda í staðinn heimilar hún það að lífi verka og láglaunafólks sé einfaldlega fórnað með því að ráðast að þeim sem fyrir höfðu það erfitt og eru nú með þessum aðgerðum sett í þá stöðu að geta ekki séð fyrir sér og fjölskyldum sínum. Er hægt að sætta sig við þetta ástand lengur? Nei, það er augljóslega ekki hægt.“

Stýrivaxtahækkun sem tæki til að ná tökum á verðbólgu sé einstaklega ósanngjarnt.

„Þetta leggst yfir alla en þetta hefur augljóslega lítil sem engin áhrif á það fólk sem hér er mjög vel statt en hefur skelfileg og eyðileggjandi áhrif á tilveruskilyrði þeirra sem með vinnu sinni knýja hér allt áfram en eru komin í þá stöðu að þau geta ekki séð fyrir sér og börnunum sínum og hafa ekkert um neitt annað að ræða heldur en að steypa sér út í skuldir til þess eins að komast af.“

Ekki er langt síðan skrifað var undir kjarasamninga út frá miðlunartillögu setts ríkissáttasemjara en Sólveig segist hafa viljað að síðasta kjaralota hefði farið allt öðruvísi fram.

„Efling barðist fyrir allt öðruvísi uppbyggingu á samningum og við bentum á strax í upphafi kjarasamningslotunnar að það ætti að fara fram með þeim hætti að fólki yrði tryggð sín hlutdeild í hagvextinum og að það þyrfti að tryggja að fólk yrði einhvern veginn ekki grafið undir þessu verðbólgu- og vaxtahrauni sem hér er látið leka yfir allt frá Seðlabankanum.“