„Þetta er sam­eigin­legt á­fall fyrir okkur öll“

Lovísa segir tíðindi morgunsins að sjálfsögðu eiga sér forsögu en er á því æskilegra hefði verið að halda starfsfólki betur upplýstu. Starfsfólk fékk laun greidd í dag en mun ekki fá greiddan uppsagnarfrest og því þurfa að sækja laun í ábyrgðarsjóð launa. 

„Það áttu sér stað breytingar í janúar þar sem við hættum að dreifa blaðinu í hús. Það voru stærstu breytingarnar sem hafa verið gerðar á Fréttablaðinu frá því að það var stofnað. Það voru breytingar sem voru ekki gerðar í samráði við starfsfólk. Við vissum það á fyrsta vinnudegi eftir áramót, þá var okkur tilkynnt þetta. 

Allt frá þeim tíma erum við búin að aðlaga okkur að nýjum aðstæðum í þeirri von að einhvern veginn myndum við bjarga þessu. Þannig að eins í dag þá komu þessar fréttir okkur mjög á óvart og maður hélt að það yrði kannski eitthvað meira gert. Að það yrði kannski haldið í vefinn eða þessu breytt í vikublað eða helgarblað, eða ég veit það ekki…“ segir Lovísa.

Finnst þér starfsfólki hafa verið haldið úti í kuldanum? Að það hefði mátt upplýsa betur um stöðu mála?

„Ég held að það hefði hundrað prósent mátt gera það. Ég skil alveg að það hafi ekki verið gert. Ég skil alveg hina hliðina. En að sama skapi þá held ég að þetta hefði kannski gengið betur ef maður hefði fengið að koma betur að því. Komið sínum hugmyndum á framfæri og fengið að aðlaga að blaði sem var ekki sett inn um lúguna heldur sem fólk tekur sjálft úti í búið. Það er allt annar veruleiki,“ segir Lovísa.

Tekjumódel sem var ekki ganga upp

Lovísa segir að þegar breytingar á dreifingu blaðsins voru kynntar í janúar hafi starfsfólk ekki endilega talið útgáfuna dauðadæmda. 

„Nei, ekkert endilega. Maður fékk kannski á tilfinninguna að þetta yrði erfitt en svo eru mánuðirnir búnir að líða og auglýsingsalan, eins og allir sem hafa skoðað blaðið hafa tekið eftir, hefur ekki gengið vel. Þannig að jú, eftir því sem hefur liðið fram þá sá maður alveg að þetta var tekjumódel sem var ekki að ganga upp. Það þurfti að gera eitthvað. En ég get alveg sagt að það bjóst enginn við þessu í dag. Enginn.“

Sameiginlegt áfall

Lovísa segir starfsmenn hafi fengið útborgað í morgun en að þeir muni ekki fá greiddan uppsagnarfrest. „Við fengum útborgað í morgun, ein mánaðarlaun, en svo var okkur sagt að félagið færi í þrot eftir helgi og við ættum að sækja það sem við eigum inni í ábyrgðarsjóð launa og skrá okkur á atvinnuleysisbætur.“

Þið ætlið á barinn, heyri ég. Hrista hópinn saman.

„Já, ég held að það sé það sem við erum að fara að gera akkúrat núna. Fólk hefur þörf fyrir að vera saman. Þetta er sameiginlegt áfall fyrir okkur öll að missa vinnuna með engum fyrirvara í dag. Þannig að já, við sem erum nú fyrrverandi starfsmenn Fréttablaðsins ætlum að hittast á barnum og fara yfir þetta mál,“ segir Lovísa.