„Ég tel að menn hafi þarna samið af sér“

Skrifað var í gær undir kjarasamninga Samtaka atvinnulífsins við VR, Landssamband íslenskra verslunarmanna og samflot tækni- og iðnaðarmanna. Samningarnir fela í sér 6,75 prósent almenna launahækkun sem afturvirk er frá 1. nóvember síðastliðnum.

Sólveig Anna Jónsdóttir formaður Eflingar segir niðurstöðuna vera vonbrigði.

„Ég tel að menn hafi þarna samið af sér og mér þykir það auðvitað mjög leitt. Þarna er verið að semja um 6,75% launahækkun í verðbólgu sem er 9,3%. Verðbólguspá fyrir næsta ár upp á rúm 6%. Inni í þessari niðurstöðu, og það er mjög mikilvægt að öll séu meðvituð um þetta, er þegar umsaminn hagvaxtarauki. Umsaminn við undirritun Lífskjarasamningsins árið 2019. Hann er þarna tekinn og honum smurt ofan á þessar hækkanir til þess að láta þær líta betur út. Þarna er verið að glutra niður tækifæri til þess að sækja til atvinnurekenda það sem að launafólk á inni í þeim gríðarlega hagvexti og því mikla góðæri sem að ríkt hefur og ríkir í fyrirtækjarekstri á Íslandi. Þannig ég get ekki annað en komist að þeirri niðurstöðu að þarna hafi menn látið smala sér inn í rétt smíðaða af Samtökum atvinnulífsins og ég bara harma það.“

Kaupmáttarrýrnun fyrir vinnandi fólk

Sjálf geti hún ekki sætt sig við samninga líkt og þessa fyrir sína félagsmenn.

„Þarna er bara verið að semja um kaupmáttarrýrnun fyrir vinnandi fólk. Ef að á þessum samningstíma verður einhver kaupmáttaraukning, sem er bara alls óvíst á þessum tímapunkti, þá verður hún kannski að meðaltali 0,5%. Það er bara mikill hagvöxtur. Það er góðæri. Íslensk auðstétt hefur tekið til sín geigvænlegt fé. Íslensk valdastétt hefur aldrei haft það betra í efnahagslegum skilningi og nú hefur það tekist hjá Samtökum atvinnulífsins að láta launafólk taka við einhverju sem það hefði aldrei átt að sætta sig við að taka við.“

Ragnar Þór Ingólfsson, formaður VR, sagði í Bítinu á Bylgjunni í morgun að hann hafi ekki hafa haft geð í sér til þess að láta mynda sig með fulltrúum Samtaka atvinnulífsins eftir að skrifað var undir kjarasamninga í gær vegna framgöngu þeirra. Sólveig segist ekki vilja tjá sig um það hvað henni þyki um að Ragnar hafi skrifað undir þessa samninga.

„Ég held að Ragnar sé nú bara afskaplega góður í að útskýra af hverju hann gerði það.“

Hefðu getað náð árangri saman

Sólveig telur mjög sérstakt að láta eins nýgerðir kjarasamningar séu framhald af Lífskjarasamningunum því slíkt sé ekki rétt. 

„Í Lífskjarasamningnum var samið um krónutöluhækkanir fyrir alla. Nú er verið að semja um prósentuhækkanir þar sem að þau sem hafa hæst laun fá mest en þau sem hafa lægst laun fá minnst.“

Henni finnist miður að verkalýðshreyfingin hafi ekki getað unnið saman að því að ná fram úrbótum á húsnæðismarkaðnum sem reynist nú mörgum erfiður. 

„Það sem að mér finnst mjög hryggilegt að ekki hafi gerst er að samtakamáttur hreyfingar vinnandi fólks hefði verið notaður til þess að ná raunverulegum árangri í að sækja það sem verður auðvitað að koma frá stjórnvöldum sem eru til dæmis raunverulegar úrbætur á húsnæðismarkaði.“

Þá sé erfitt að meta það nú hvort það stefni í átök í kjaradeilu Eflingar og Samtaka atvinnulífsins.

„Við vitum að við þurfum að hafa mikið fyrir hlutunum en við vitum líka að við getum náð árangri. Við höfum náð mjög miklum árangri þegar við höfum verið ein í baráttu fyrir okkar félagsfólki. Þannig við hræðumst það ekki.“