Vilja hætta að merkja vín sín Rioja

Beiðni þeirra um nýju merkinguna er komin fyrir Evrópu­sam­bandið en fram­leið­endurnir hafa þegar hlotið stuðning spænsku ríkis­stjórnarinnar og stjórnar Baska­lands í málinu.

Flestir Ís­lendingar þekkja Rioja-vínin vel en Rioja-stimpilinn er lög­verndaður og mega að­eins fram­leið­endur frá af­mörkuðum svæðum nota hann á vín sín. Svæðin sem falla undir Rioja-svæðið eru sjálf­stjórnar­svæðið La Rioja, hluti sjálf­stjórnar­svæðisins Navarra og bask­neska héraðið Álava.

Bask­nesku vín­fram­leið­endurnir vilja nú slíta öll tengsl við Rioja-gæða­stimpilinn og skapa sinn eigin, sem mun bera bask­neska heitið Araba­ko Mahasti­ak eða Viñedos de Álava á spænsku.

Baskarnir hafa bent á gamlar hella­myndir sér­stöðu sinni til stuðnings sem eiga að sanna að þeir styðjist við að minnsta kosti þúsund ára gamla hefð í vín­gerð á svæðinu. Sömuleiðis er ekki úr vegi að skilja óskir Baskanna sem lið í sjálfstæðistilburðum þeirra, sem eru gömul saga og ný.

Meiri gæði eiga að felast í Álava-vínunum heldur en flestum öðrum Rioja-vínum en eins og staðan er í dag mega 473 vín­fram­leið­endur merkja vín sín með Rioja-stimplinum, samkvæmt frétt The Guardian um málið.