Appel­sínu­gul veður­við­vörun á Suður­landi

Veðurstofa Íslands hefur gefið út appelsínugula veðurviðvörun fyrir Suðurland. Viðvörunin tekur gildi klukkan 18 í kvöld og gildir til miðnættis.

„Austan stormur eða rok, 23-28 m/s og vindhviður allt að 40 m/s. Fyrst austan til á svæðinu, einkum undir Eyjafjöllum og í Vestmannaeyjum en einnig með suðurströndinni seinna í kvöld. Stórhríð og skafrenningur. Víðtækar samgöngutruflanir líklegar, og ekkert ferðaveður á meðan viðvörunin er í gildi,“ segir á vef Veðurstofunnar um viðvörunina.

Frá því klukkan eitt í dag hefur gul viðvörun verið í gildi á Suðurlandi. Gul viðvörun tekur aftur gildi á miðnætti þegar sú appelsínugula fellur úr gildi og gildir til klukkan sex annað kvöld.

Þá eru nú þegar einnig gular viðvaranir í gildi fyrir Faxaflóa og höfuðborgarsvæðið. Gul viðvörun virkjast svo á Suðausturlandi klukkan sjö í kvöld og á miðnætti virkjast gul viðvörun fyrir miðhálendið.

Austan hvassviðri geisar á landinu, víða 15 til 23 metrar á á sekúndu seinni partinn en þó er hægara og úrkomuminna fyrir norðan.

Óveðrið spillir færð en Suðurstrandavegur er lokaður eins og er. Óvissustig er á Reykjanesbraut en til lokunar gæti komið með skömmum fyrirvara. Hið sama gildir um Hellisheiði og Grindavíkurveg. Vegfarendur ættu því að fylgjast vel með færð á vegum og fara að öllu með gát.